Binəqədi sakinləri şadlıq saraylarının bacalarından çıxan tüstüdən narahatdırlar

Bakı şəhəri Binəqədi rayonu ərazisində fəaliyyət göstərən bir neçə şadlıq sarayının bacasından çıxan tüstü yaxınlıqda yaşayan sakinlərin narazılığına səbəb olub.

BAKU.WS-in "qaynar xətti"nə daxil olan şikayətə əsasən, yayılan kəskin tüstü həm insanların sağlamlığına mənfi təsir edir, həm də ətraf mühitə ciddi ziyan vurur.

Məsələ ilə bağlı Ekologiya və Təbii Sərvətlər Nazirliyinə sorğu ünvanladıq.

Qurumun mətbuat katibi İradə İbrahimova bildirdi ki, məsələ artıq araşdırılır.

"Azərbaycanda fəaliyyət göstərən restoran və ictimai iaşə obyektlərindən havaya atılan tullantıların mövcud normativlərə uyğunluğunu müəyyən etmək məqsədilə növbəti monitorinqlərə başlanılır.

Dövlət Ekoloji Təhlükəsizlik Xidməti və Ətraf Mühitin Çirklənməsinin Monitorinq Qrupunun əməkdaşları aprelin 14-dən iaşə obyektləri və restoranların ətrafında ölçmə işləri aparacaq, havaya normadan artıq tullantı atan obyektlər barəsində qanunamüvafiq tədbirlər görəcək.

Restoran və şadlıq saraylarının sahiblərini əvvəlcədən xəbərdar edirik ki, obyektlərindəki təmizləyici qurğuların texniki çatışmazlıqlarını aradan qaldırsınlar, qurğuların filtrlərini yeniləsinlər".

Telegramda izləyin