Z nəslinin nümayəndələrini ofisdə işlətmək olmur, yataq otağı tələb edirlər - Araşdırma

ABŞ-da fəaliyyət göstərən onlayn CV hazırlama platforması olan "Resume.io" yeni nəslin iş yerindən gözləntilərini müəyyən edən araşdırma aparıb.

Ölkə.Az xarici KİV-ə istinadla xəbər verir ki, buna səbəb işəgötürənlərin Z nəslini ofislərə cəlb etməkdə çətinlik çəkməsidir.

Bir çox sektorlarda gənc işçi qüvvəsi itkisi var. Araşdırmaya görə, yaşı 28-dən aşağı olan hər 6 nəfərdən birinin ofisdən işləmək üçün əsas şərti iş yerində yataq otağının olmasıdır.

Onların 20% ofisdə stolüstü tennis kimi oyunların, 20%-isə iş yerlərinin ev heyvanları üçün əlverişli olmasını istəyir.

Gənc işçilərin 33%-i pulsuz qəlyanaltı və yemək gözləyir.

Hər üç nəfərdən biri həftədə yalnız 4 gün işləməyi qəbul edir.

25% şəxsi inkişafa diqqət yetirmək və ya səyahət edə bilmək üçün uzunmüddətli ödənişli məzuniyyətlərin müqavilədə müəyyən edilməsini istəyir.

Mütəxəssislər yeni nəslin iş və şəxsi həyat arasında tarazlığı nəzərə alan bir iş sistemi istədiklərini və şəxsi hüquqlarından daha çox kənar faydalara önəm verdiklərini bildirirlər. Onlar qeyd edirlər ki, şirkətlər gənc və istedadlı işçi qüvvəsi üçün "daimi iş" modelini dəyişdirərək bu dəyişikliyə uyğunlaşmalıdırlar.

Odur ki, Z nəslinin iş yerlərindən tələblərini təqdim edirik:

76% iş vaxtından artıq işləməyə görə əlavə ödəniş,
75% ödənişli xəstəlik məzuniyyəti,
73% əhatəli tibbi sığorta,
67% pensiya paketi,
59% kompleks stomatoloji paket,
53% göz sağlamlığı dəstəyi,
48% performansa əsaslanan bonuslar,
39% dəyişkən iş saatları,
37% pulsuz parkinq və ya nəqliyyat xərclərində endirim,
31% analıq məzuniyyəti və valideyn dəstəyi paketləri,
28% əlavə illik məzuniyyət,
28% erqonomik iş yerləri və daha yaxşı texnologiya,
27% rüblük əmək haqqının qiymətləndirilməsi və performansa əsasən düzəliş,
26% ofisdə rahat geyinmək.

Qeyd edək ki,1946–1964-cü illərdə doğulanlar beybi bumerlər, 1965-80-ci illər X nəsli, 1981-96 Y nəsli, 1997-2012-ci illər isə Z nəslidir.

Alfa nəsli isə 2013-cü ildən bu günə qədər doğulan uşaqlardır.

Telegramda izləyin