Özümüzü xoşbəxt hiss etdikdə niyə ağlayırıq?

Bristol Universitetinin britaniyalı alimləri bizi sevincdən və digər güclü hisslərdən ağladan mexanizmləri aşkar ediblər. Məlum olub ki, göz yaşları beyinə emosional yüklənmənin öhdəsindən gəlməyə kömək edir.

Oxu.Az bildirir ki, bu barədə "The Conversation" portalı məlumat verib.

Bildirildiyinə görə, göz yaşlarının sevinc və ya kədərdən qaynaqlanmasından asılı olmayaraq, onlar limbik sistem - beyinin emosional mərkəzi həddindən artıq hisslərlə qarşılaşdıqda baş verir. Amigdala (beyinin badam şəkilli bölgəsi - red.), hipotalamus və ön singulyat qabığı birlikdə işləyərək, intensiv hisslərə cavab kimi göz yaşının əmələ gəlməsinə səbəb olur.

"Göz yaşları beyinin "Dayan, mən artıq bunu emal edə bilmərəm" demə üsuludur", - deyə neyrobioloqlar izah ediblər.

Emosiyalar, istər sevinc olsun, istər kədər, pik həddə çatdıqda, bədən "təcili klapan"ı - parasimpatik sinir sistemini aktivləşdirən, ürək döyüntülərini yavaşladan və bədəni tarazlığa qaytaran ağlamağı işə salır.

Tədqiqatlar göstərir ki, "xoşbəxtlik göz yaşları" nadir hallarda sırf sevincli olur. Çox vaxt onlar hisslər kokteylindən doğulurlar: qürur, nostalgiya, rahatlıq və ya hətta yüngül kədər. Məsələn, övladının məzuniyyətini izləyən valideynlər eyni vaxtda həm sevinc, həm də vaxt ötüb getdiyi üçün həsrət hiss edə bilərlər.

Yaddaşdan məsul olan hippokamp bu effekti gücləndirir, şüura keçmiş çətinliklər və ya itkilərlə bağlı xatirələri ötürür. Bax bu səbəbdən həssas anlar tez-tez boğazda düyünlənmə hissinə səbəb olur - beyin indiki sevinci keçmişin emosional yükü ilə əlaqələndirir.

Alimlər qeyd ediblər ki, göz yaşlarını saxlaya bilməmək çox güman ki, ünsiyyət vasitəsi və sosial əlaqələri gücləndirmək üçün üsul kimi inkişaf edib. Tədqiqatlar təsdiqləyir ki, ağlayan insanlar göz yaşlarının səbəblərindən asılı olmayaraq, başqalarından daha çox kömək alırlar.

Telegramda izləyin