Yer kürəsi quşların yox olması böhranı ilə üz-üzədir

Elm adamları gələcək əsrdə 500-dən çox quş növünün yox ola biləcəyini müəyyən ediblər. Onlar quş populyasiyasını bərpa etmək üçün təcili proqramların həyata keçirilməsinə çağırıblar.

Oxu.Az xəbər verir ki, bu barədə "The Guardian" nəşri məlumat verib.

Qeyd olunub ki, hətta bir neçə quş növünün yoxa çıxması bütün dünyada ekosistemləri məhv etmək təhlükəsi yaradır. Redinq Universitetinin tədqiqatının aparıcı müəllifi Kerri Stüartın sözlərinə görə, Yer kürəsi quşların yox olması böhranı ilə üz-üzədir. Proqnozlara görə, 2125-ci ilə qədər planetdə son 500 ildəkindən daha çox quş yoxa çıxacaq.

Quşların nəslinin kəsilməsində əsas amil kənd təsərrüfatının genişlənməsi və inkişafı olub. Onların populyasiyasına, həmçinin iqlim dəyişikliyi, meşələrin məhv olması, yaşayış mühitinin pisləşməsi kimi amillər təsir edir. Eyni zamanda, quşlara mənfi təsir dayandırılsa belə, 250 növ quş yenə də yox olacaq.

Alimlər unikal növləri qoruyub saxlamaq üçün bu quşları təcrid edilmiş şəkildə yetişdirmək və onların yaşayış yerlərini bərpa etmək üçün proqramların yaradılmasına çağırırlar.

Telegramda izləyin