"DeepSeek" flaqman modelinin buraxılışını yenə təxirə saldı

"DeepSeek" startapı "R2" yeni dil modelinin təqdimatını təxirə salıb.

Oxu.Az bu barədə "Reuters"ə istinadla xəbər verir.

Məlumata görə, şirkətin baş direktoru Lyan Venfen modelin mövcud versiyasından narazı qalıb. O bildirib ki, "R2" daxili keyfiyyət standartlarına uyğun gəlmir və bu səbəbdən buraxılış ertələnib.

Qeyd edək ki, "R2" modeli ilkin olaraq may ayında təqdim olunmalı idi. O, Çində populyarlaşmış əvvəlki "R1" modelinin təkmilləşdirilmiş variantı kimi proqramlaşdırma sahəsində daha güclü imkanlar və qeyri-ingilis dillərinə dəstək təqdim etməli idi. Lakin inkişaf işlərinin davam etməsi və rəhbərliyin yekun razılığının olmaması təqdimat tarixini qeyri-müəyyən vaxta qədər uzadıb.

Bundan əlavə, layihənin gecikməsinə ABŞ-ın ixrac sanksiyaları da təsir göstərir. Bu sanksiyalar Çindəki bulud xidmətləri provayderlərinin "NVidia" şirkətinin müasir qrafik prosessorlarına çıxışını məhdudlaşdırır. Halbuki bu avadanlıq "R2" modelinin stabil və effektiv işləməsi üçün həyati əhəmiyyət daşıyır.

Xatırladaq ki, aprel ayında tətbiq edilən yeni ixrac məhdudiyyətləri nəticəsində "NVidia" şirkəti artıq "H20" çipini Çinə sata bilmir. Halbuki bu, Çinə ixrac oluna bilən yeganə süni intellekt prosessoru hesab olunurdu.

Telegramda izləyin