Ziyarətçi 6,2 milyon dollarlıq bananı yedi – ən bahalı nahar

Fransada yerləşən müasir incəsənət muzeyində qəribə hadisə yaşanıb: ziyarətçi İtalyan rəssam Mauritsio Kattelanın divara yapışdırılmış, 6,2 milyon dollar dəyərində olan "Komediyaçı" adlı banan əsərini yeyib.

Sonxeber.az xəbər verir ki, hadisə Fransanın şərqində yerləşən Centre Pompidou-Metz müasir incəsənət muzeyində baş verib. Muzeyin açıqlamasına görə, ziyarətçi divara bantlanmış bananı qopararaq yeyib. Təhlükəsizlik işçiləri hadisəyə dərhal müdaxilə edib, bir neçə dəqiqə sonra isə banan əsərinin yerinə yenisi qoyulub. Muzey, bananın Kattelanın təlimatına əsasən vaxtaşırı dəyişdirildiyini bildirib.

Maraqlıdır ki, bu əsər ilk dəfə 2019-cu ildə ABŞ-ın Mayami şəhərində keçirilən Art Basel sərgisində nümayiş etdirilmiş və 120 min dollara satılmışdı. Həmin sərgidə performans sənətçisi Devid Datuna da bananı yeyərək gündəmə gəlmişdi. 2023-cü ildə Cənubi Koreyada bir tələbə eyni əsəri "ac olduğu üçün" yemişdi. 2024-cü ilin noyabrında isə çinli kolleksiyaçı Castin San bananı 6,24 milyon dollara almış, daha sonra o da əsəri yemişdi.

Telegramda izləyin