Avtobus sürücüsü boğulmaq təhlükəsi yaşayan 3 yaşlı uşağın həyatını xilas etdi

Kocaelidə 3 yaşlı uşağın boğazına cips ilişib, nəfəs ala bilmədiyi anlarda avtobus sürücüsünün çevikliyi sayəsində faciə yaşanmayıb.

Sonxeber.az türk mediasına istinadən xəbər verir ki, hadisə Kocaeli Böyükşəhər Bələdiyyəsinə məxsus, Ulaşım Park A.Ş.-yə aid sərnişin avtobusunda baş verib.

Məlumata görə, Gebze-Dilovası istiqamətində hərəkət edən avtobusda birdən-birə sərnişinlərin səsi yüksəlib. Bu zaman sürücü Ferdi Karabacak dərhal avtobusu kənara çəkərək vəziyyətə müdaxilə edib.

3 yaşlı uşağın nəfəs borusuna cips ilişdiyini görən sürücü, Heimlich manevrası edərək uşağın nəfəsini açıb. Onun soyuqqanlı davranışı və saniyələr içində göstərdiyi peşəkarlıq nəticəsində uşaq xilas edilib. Hadisə avtobusun təhlükəsizlik kamerasına da yansıyıb.

Kocaeli Böyükşəhər Bələdiyyə Başçısı Tahir Büyükakın həmin görüntüləri sosial media hesabında paylaşaraq sürücüyə təşəkkür edib:

"Allah səndən razı olsun. Ferdi kapitanımız boğazına yemək qaçan balaca sərnişinimizi Heimlich manevrası ilə xilas etdi. Tez və soyuqqanlı müdaxiləsinə görə sürücümüzü təbrik edirəm. İnsan həyatına toxunan bu nümunəvi davranış hamımız üçün qürurverici oldu."

Telegramda izləyin