Limonların saxlanmasında edilən SƏHVLƏR

Bir çox evdar qadınlar limonların tez xarab olması ilə qarşılaşır, hətta soyuducuda saxlanıldıqda belə. Əsas səbəblər yanlış saxlama, rütubətlə təmas və uyğun olmayan qabda saxlanmasıdır.

Bu barədə Lent.az məlumat verir.

Niyə limonları soyuducuda saxlamaq lazımdır?

Bütün təzə meyvələr kimi, limonlar da xarab olur. Xarab olmuş limonlar adətən çox yumşaqlaşır, sürüşkən hala gəlir, büzüşmüş görünür, xoşagəlməz qoxuya malik olur və ya üzərində görünən kif əmələ gəlir. Əgər limonlarınızda bu əlamətlər varsa, onları atmaq daha yaxşıdır. US Citrus-un məlumatına görə, limonlar soyuducuda 4–6 həftə saxlanıla bilər. Onları otaq temperaturunda da saxlamaq olar, amma digər meyvələr kimi tez xarab olurlar. Otaq temperaturunda saxlanılan limonun ən yaxşı halda bir həftə ərzində yeyilməsi tövsiyə olunur. Soyuq limonlardan isə suyu sıxmaq çətin olur. Buna görə də istifadə etməzdən bir neçə saat əvvəl soyuducudan çıxarmaq yaxşıdır.

Nələrdən çəkinmək lazımdır?

Limonları polietilen torbalarda saxlamayın, çünki onlar nəm saxlayır və bu da xarab olma prosesini sürətləndirir. Limonları qovun, banan, alma, pomidor və avokado ilə yanaşı saxlamayın. Bu meyvələr limonların tez xarab olmasına səbəb olur.

Necə saxlamaq lazımdır?

Bütöv limonlar
Onları soyuducuda meyvə-tərəvəz üçün nəzərdə tutulmuş çəkməcədə saxlamaq ən yaxşı üsuldur. Burada rütubət aşağı olur, limonlar sərin və quru qalır. Həmçinin çəkməcənin hava ventilyasiyasını açmaqla meyvələrə hava axınını artırmaq məsləhətdir.

Kəsilmiş limonlar
Kəsildikdən sonra limonu qida plyonkasına bükün və ya hermetik qapaqlı qaba qoyun. Soyuducuda saxlayın və bir neçə gün ərzində istifadə edin, çünki kəsildikdən sonra limon tez quruyur.

Limon suyu
USDA-nın məlumatına görə, təzə sıxılmış limon suyunu hermetik bağlanmış qabda, məsələn bankada, soyuducuda 5–7 gün saxlamaq olar. Uzunmüddətli saxlama üçün suyu dondurun. Bunun ən yaxşı üsulu – suyu buz qəliblərinə tökməkdir. Beləliklə, şirə kiçik porsiyalarla saxlanacaq.

Limon qabığı
Onu dondurucu paketində və ya hermetik qabda 3 ayadək dondurucuda saxlamaq olar. Dondurulmuş halda rəndələnmiş qabığı birbaşa salat souslarına, tort xəmirlərinə və ya souslara əlavə edə bilərsiniz.

Telegramda izləyin