Gizli TƏHLÜKƏ: Yastığın altına mobil telefon qoyub yatmağın riskləri

Çoxlarına tanış olan və zahirən təhlükəsiz görünən yastığın altına telefon qoyub yatmaq vərdişi göründüyü qədər zərərsiz deyil.

Oxu.Az bildirir ki, bu barədə Rusiya Texnologiya Universitetinin Praktiki və tətbiqi informatika kafedrasının baş müəllimi Qleb Derevlev Gazeta.ru-ya müsahibəsində danışıb.

"Smartfonlar iş rejimində və şarj olduğu zaman istilik ayrılır. Yastığın altında istilik yayılması pozulur ki, bu da cihazın daha çox qızmasına səbəb olur. Bu, ümumilikdə cihaz üçün yaxşı deyil və potensial alışma mənbəyi olan batareya üçün kritikdir. Nəticədə, cihazın həddindən artıq istiləşmə və qısaqapanma nəticəsində yarana biləcək alışma riski artır, xüsusən də cihaz bu zaman şarj olursa. Aşağı keyfiyyətli şarj cihazları və kabellərdən istifadə etdikdə, risklər daha da artır", - deyə o bildirib.

Alovlanma riski batareya ilə yarana biləcək yeganə problem deyil, uzun müddət qeyri-müntəzəm rejimdə istifadə edilərsə, batareya şişə və bu da cihazın tam şəkildə zədələnməsinə gətirib çıxara bilər.

"İsinmə və alışma ilə yanaşı, başqa bir risk də var. Müasir smartfonlar yapışqanla yığılır ki, bu da isinmə zamanı mayeləşir, ona görə də telefonun ekranı və ya daxili yığımın bir hissəsi asanlıqla qopa bilər", - deyə ekspert qeyd edib.

Ümumdünya Səhiyyə Təşkilatı mobil cihazların yaratdığı radiotezlik sahələrini mümkün kanserogenlər kateqoriyasına aid edir. Xərçənglə birbaşa əlaqə sübut edilməyib, lakin məlumdur ki, başın yaxınlığında elektromaqnit şüalanmasına uzun müddət məruz qalma nəzəri olaraq hüceyrə prosesləri və toxuma termorequlyasiyasına mənfi təsir göstərə bilər.

"Telefonu gecə saatlarında uçuş rejiminə keçirmək və ya simsiz modulları - mobil rabitəni, Wi-Fi, Bluetooth, NFC və geolokasiyanı söndürmək tövsiyə olunur. Gecə saatlarında bu funksiyaların söndürülməsi akkumulyatorun yükünü və həddindən artıq qızma riskini azaldır", - deyə o məsləhət görüb.

Smartfonu başdan bir metrdən yaxın olmayan sərt səthə qoymaq daha yaxşıdır, əgər o zəngli saat kimi istifadə olunursa, onu elə qurun ki, siqnalı söndürmək üçün yataqdan qalxmalı olasınız.

"Bu, gecə saatlarında cihazla təmasdan qaçmağa və oyanma keyfiyyətini yaxşılaşdırmağa kömək edir. Riskləri minimuma endirmək üçün smartfonu yataqda istifadə etməmək, xüsusən də şarj olarkən və rəqəmsal gigiyena qaydalarına riayət etmək məsləhətdir: yatmazdan 30-60 dəqiqə əvvəl cihazla fəaliyyəti dayandırmaq, bildirişləri söndürmək və batareyanın vəziyyətini mütəmadi olaraq yoxlamaq lazımdır", - deyə ekspert əlavə edib.

Telegramda izləyin