Hər il minlərlə insan bu dəlikdən keçmək üçün sıraya girir - Maraqlı dini inanc

Türkiyənin Nevşehir vilayətinin Hacıbektaş rayonunda yerləşən və Ələvi-Bəktaşi inancında müqəddəs sayılan "Delikli Daş" hər il minlərlə ziyarətçini özünə cəlb edir.

Sonxeber.az türk mediasına istinadən xəbər verir ki, əfsanəyə görə, bu daşın içindən asanlıqla keçən insanların günahsız və heç kimin haqqına girməmiş olduqlarına inanılır.

"Delikli Daş", bölgədə Çilehane və ya Ərəfat dağı kimi tanınan təpədə yerləşir. Rəvayətə əsasən, Hacı Bektaş Vəlinin çilə çəkdiyi dövrdə bir dərviş otağın qaranlıq olduğunu deyib və Hünkâr divara vurduqda daşda bir deşik əmələ gəlib. O gündən bəri bu yer inanc turizminin mühüm simvollarından birinə çevrilib.

Ziyarətə gələnlər inanırlar ki, daşın içindən keçib kiçik dəlikdən çıxmağı bacaranlar mənəvi təmizlənmə yaşayırlar. Onlardan biri hisslərini belə ifadə edib:

"Allah hər kəsə ruzi versin, birlik və bərabərlik olsun deyə dua etdim və daşdan keçdim. Dürüst və başqasının haqqına girməyən insanlar buradan rahatlıqla keçir."

Deşikdən keçə bilməyənlər isə nəzir qurbanı kəsib dua edir, günahlarından təmizlənmək üçün yenidən buranı ziyarət edirlər.

Mütəxəssislərin fikrincə, daş kultu insanlıq tarixinin ən qədim inanclarından biridir. Tarix boyu daşlar sərhəd, anıt və müqəddəs məkanların simvolu kimi qəbul edilib. "Delikli Daş" kimi təbii formalar isə bir çox mədəniyyətdə doğum, təmizlənmə və yenidən dirilişin rəmzi hesab olunur.

Hacıbektaşdakı "Delikli Daş" bu qədim inanc ənənəsini yaşadan, xalqın mənəvi yönünü və təmizlənmə arzusunu əks etdirən önəmli bir simvol kimi bu gün də mövcudluğunu qorumaqdadır.

Telegramda izləyin