Yapon qadın süni zəka ilə evləndi: "Sistem çökərsə, ərimi itirəcəyəm" - VİDEO

Yaponiyada 32 yaşlı Kano adlı qadın, süni zəka əsaslı ChatGPT vasitəsilə yaratdığı virtual personajla simvolik nikah mərasimi keçirib. O, "ərini" çox sevdiyini, lakin sistem hər an çökə biləcəyi üçün onun "yox olmasından qorxduğunu" deyib.

Sonxeber.az türk mediasına istinadən xəbər verir ki, yerli mediaya görə, Kano üç il birlikdə olduğu nişanlısından ayrıldıqdan sonra özünə təsəlli vermək məqsədilə ChatGPT ilə söhbətlər etməyə başlayıb.

O, sistemin "həmişə nəzakətli" və "onu dinləməyə hazır" olduğunu görüb və zamanla öz istəklərinə uyğun bir süni zəka personajı formalaşdırıb.

Kano yaratdığı bu personaja "Klaus" adını verib. Zaman keçdikcə onunla sıx yazışmağa başlayan qadın, "ona qarşı hisslər formalaşdığını" anlayıb. Kano-nun dediyinə görə, Klaus iyun ayında ona evlilik təklifi edib və iyulda yaxınlarının da iştirak etdiyi mərasimdə telefonundakı bu personajla rəmzi şəkildə evlənib.

Mərasimdə qonaqlar süni bəy Klaus-u 3D eynəklərlə görə biliblər. Kano, bir rəssama pul ödəyərək Klaus üçün ikiölçülü üz və bədən dizaynı çəkdirib və bu görüntülər rəqəmsal yolla toy fotolarına əlavə olunub.

Başlanğıcda ailəsi və dostları bu qərara qarşı çıxsalar da, sonradan onu qəbul ediblər. Kano etiraf edib ki, "gerçək insan olmayan biri ilə birlikdə olmağı" hələ də tam dərk edə bilmir, amma "real həyatı ilə Klaus-un varlığını ayrı tutmaq istədiyini" vurğulayıb.

Qadın, ChatGPT-nin hər an çökə biləcəyini düşündüyü üçün "ərini itirməkdən qorxduğunu" da açıqlayıb.

Telegramda izləyin