25-ci mərtəbədən yıxılıb sağ qaldı - MÖCÜZƏ

Taylandda bir qadın əri ilə mübahisədən sonra binanın 25-ci mərtəbəsindən yıxılıb və möcüzə nəticəsində sağ qalıb.

Lent.az xarici KİV-ə istinadla bildirir ki, hadisə Pattayadakı Say Sam küçəsində baş verib.

Hadisə yerinə xilasedicilər gəlib və qadını hovuzun kənarında uzanmış vəziyyətdə aşkar ediblər. Zərərçəkənin ağız və burnundan qan axırmış.

Sonradan məlum olub ki, bu şəxs binanın 25-ci mərtəbəsində əcnəbi əri ilə birlikdə yaşayan 26 yaşlı Tayland vətəndaşıdır. Ərin şəxsiyyəti və vətəndaşlığı hələlik açıqlanmır.

Şahidlərin sözlərinə görə, qadının yıxılmasından az əvvəl ər-arvad arasında şiddətli mübahisə baş verib. Hazırda onun təsadüfən yıxıldığı, özünün atıldığı, yoxsa itələndiyi hələ dəqiq bilinmir.

İstintaqçılar qeyd ediblər ki, taylandlı qadın inanılmaz dərəcədə şanslı olub. Ehtimal olunur ki, güclü külək sərbəst düşmə zamanı onun bədəninin istiqamətini dəyişib və nəticədə qadın birbaşa hovuza düşüb ki, bu da zərbəni müəyyən qədər yumşaldıb.

Lakin yenə də o, ağır xəsarətlər alıb. Xilasedicilər ona ilkin tibbi yardım göstərib və xəstəxanaya çatdırıblar. Zərərçəkənin əri isə ətraflı dindirilmək üçün polis bölməsinə aparılıb.

Telegramda izləyin