İki ildir yatmır, yuxulu da olmur - Nadir xəstəlik

32 yaşlı britaniyalı Oliver Elvis 2023-cü ilin dekabrından bəri demək olar ki, yatmamasına səbəb olan naməlum xəstəlik barədə danışıb. O, bu müddətdə bir dəfə də olsun normal şəkildə yuxuya gedə bilmədiyini, güclü yuxu dərmanları və hətta tibbi narkoz daxil olmaqla ənənəvi müalicə üsullarının nəticə vermədiyini iddia edir.

Lent.az xarici KİV-ə istinadla bildirir ki, Elvisin sözlərinə görə, əvvəllər o, sutkada 6-10 saat yatırdı və ciddi sağlamlıq problemi yox idi. Lakin bir axşam yuxusu gəlməyib və o vaxtdan vəziyyət dəyişməyib.

"Ən qəribəsi odur ki, mən heç yuxulu da olmuram. Beynim sanki fövqəladə rejimdə ilişib qalıb", - deyə britaniyalı bildirib.

Oliver qeyd edib ki, sağlam həyat tərzi sürür, mütəmadi idmanla məşğul olur və vaxtının çox hissəsini təmiz havada keçirir. Buna baxmayaraq, yuxusuzluq onun vəziyyətini kəskin şəkildə pisləşdirib. 2024-cü ilin yanvarında o, qatar maşinisti işini tərk etməyə, evini satmağa və yenidən anasının yanına köçməyə məcbur olub.

Kişinin sözlərinə görə, xəstəlik dövründə o, nevroloqlar, psixiatrlar və yuxu üzrə mütəxəssislər daxil olmaqla müxtəlif həkimlərə müraciət etsə də, təsirli müalicə ala bilməyib. Elvis iddia edir ki, bəzi həkimlər onun dediklərinə şübhə ilə yanaşıb və ya onun faydasız hesab etdiyi üsullar tövsiyə ediblər.

Müayinələr zamanı ona posttravmatik stress pozuntusu, xroniki yorğunluq sindromu və fibromialgiya diaqnozu qoyulub. Lakin onun sözlərinə görə, həkimlərin tövsiyələri ümumi məsləhətlərdən ibarət olub: "özünü nəzarətdə saxla" və "daha çox dincəl".

Oliver həmçinin ciddi fiziki simptomlardan danışır: əzələ və oynaq ağrıları, görmə problemləri, həzm pozuntuları və başda güclü təzyiq hissi. O bildirir ki, yuxusuzluq ona normal həyat yaşamağa imkan vermir.

Nevroloq-konsultant professor Qay Leşziner isə ehtimal edib ki, xəstə paradoksal yuxusuzluqdan əziyyət çəkə bilər. Bu, nadir pozuntudur və insan yuxu mərhələləri olsa belə, özünü yatmamış hesab edir.

Mütəxəssisin sözlərinə görə, bu vəziyyətdə şüurluluğa cavabdeh olan beynin bəzi sahələri dərin yuxu mərhələsinə tam keçməyə bilər. Paradoksal yuxusuzluq çox vaxt psixi pozuntularla müşayiət olunur və belə hallarda kompleks müalicə vacib sayılır.

Telegramda izləyin