Dəhşətli yol mübahisəsi: Sürücü kuryeri əvvəl döydü, sonra avtomobillə vurdu - VİDEO

İstanbulun Ümraniyə rayonunda baş verən yol mübahisəsi ağır insidentlə nəticələnib. Məlumata görə, avtomobil sürücüsü ilə motosikletli kuryer arasında yol vermə üstündə yaranan mübahisə qısa müddətdə böyüyərək davaya çevrilib.

Sonxeber.az türk mediasına istinadən xəbər verir ki, hadisə zamanı avtomobil sürücüsü əvvəlcə kuryerə fiziki zorakılıq tətbiq edib. Bununla kifayətlənməyən sürücü daha sonra kuryerin üzərinə avtomobil sürərək onu vurub və hadisə yerindən qaçıb. Baş verən anlar motosikletli kuryerin kask kamerası tərəfindən qeydə alınıb.

Ağır xəsarət alan kuryerin ayağının sındığı bildirilir. Yaralı dərhal təcili tibbi yardım vasitəsilə xəstəxanaya çatdırılıb.

Hadisədən sonra qaçan sürücü polis əməkdaşları tərəfindən saxlanılıb. Faktla bağlı araşdırma aparılır.

Telegramda izləyin