Netanyahu İranla bağlı gizli əmrlər verdi - Tələskənliyin SƏBƏBİ

Binyamin Netanyahu yaxın günlər ərzində İranın müdafiə-sənaye kompleksinə maksimum zərbə endirilməsi barədə göstəriş verərək hava kampaniyasının təcili mərhələsinə start verib.

Lent.az xarici KİV-ə istinadla bildirir ki, belə sərt vaxt məhdudiyyəti Tel-Əvivin narahatlığı ilə izah olunur: Vaşinqtonla Tehran arasında diplomatik təmasların sürətlə irəliləməsi döyüş əməliyyatlarının qəfil dayandırılmasına səbəb ola bilər.

Mənbələrin məlumatına görə, İsrail rəhbərliyi Ağ Evin sülh razılaşmasının əldə olunduğunu elan etməsindən əvvəl qalan "imkan pəncərəsi"ndən maksimum istifadə etməyə çalışır. Əmrin icrası üçün son tarix kimi cümə axşamı müəyyən edilib: bu vaxta qədər İsrail Hərbi Hava Qüvvələri İranın silah istehsal edən mümkün qədər çox strateji müəssisəsini vurmalıdır.

Bu tələskənlik İsrailin ABŞ-ın 15 bənddən ibarət sülh planının surətini əldə etməsinə birbaşa reaksiya olub. Həmin plan artıq vasitəçilər vasitəsilə İran tərəfinə təqdim edilib.

Yüksək vəzifəli israilli rəsmilər və insayderlər bildirirlər ki, Donald Tramp ilə İran rəhbərliyi arasında razılaşmanın əldə olunma ehtimalı hazırda çox yüksək qiymətləndirilir. Tel-Əvivdə narahatdırlar ki,

ABŞ prezidenti istənilən an rəsmi sülh danışıqlarının başlandığını elan edə bilər və bu da faktiki olaraq İsrail ordusunun hərəkət imkanlarını məhdudlaşdırar.

Məhz buna görə hədəflərin siyahısı təcili şəkildə genişləndirilib, zərbələrin intensivliyi isə maksimum səviyyəyə çatdırılıb.

Əsas qərarlar ötən çərşənbə axşamı Kiriya qərargahında keçirilən, qapalı və olduqca emosional keçən dar tərkibli hərbi kabinet iclasında qəbul edilib. Anonim mənbələrin məlumatına görə, iclas zalında vəziyyət son dərəcə gərgin olub. Hərbi Hava Qüvvələrinin komandanlığı və kəşfiyyat rəhbərliyi baş nazirə İranın hələ də məhv edilməmiş hərbi infrastruktur obyektlərinin siyahısını təqdim edib. Bunlar mümkün hücumlara moratorium qüvvəyə minməzdən əvvəl zərbə endirilə biləcək hədəflər kimi göstərilib.

Telegramda izləyin