İsveçrədə 2000 illik Roma çörəyi tapıldı

İsveçrədə Sürix yaxınlığında yaşayış kompleksinin tikintisi zamanı aparılan qazıntılar zamanı təxminən 2000 illik kömürləşmiş Roma dövrünə aid çörək parçası aşkarlanıb.

Qaynarinfo-un "Popular Science"a nəşrinə istinadən məlumatına görə, tapılan artefaktın eni təxminən 4 düym, qalınlığı isə 3 düymdür.

Mütəxəssislər onun tortilla tipli çörək olduğunu ehtimal edirlər. Qeyd olunur ki, bu cür tapıntılar olduqca nadirdir, çünki qida və digər üzvi materiallar adətən zamanla sürətlə parçalanır.

Alimlər bildirirlər ki, belə istisna hallar yalnız xüsusi şəraitdə, məsələn, eramızın 79-cu ilində Pompey yaxınlığında baş verən vulkan püskürməsi zamanı olduğu kimi qidaların qəfil kömürləşməsi nəticəsində mümkün olur. Hazırda tapılan çörəyin min illər boyu necə qorunub saxlandığını müəyyən etmək üçün laborator analizlər aparılır.

Artefakt, Roma imperiyası dövründə strateji əhəmiyyətə malik olan və legion əsgərləri üçün forpost kimi istifadə edilən qədim Vindonissa yaşayış məntəqəsinin yaxınlığında tapılıb. Bu ərazi çay yolları və sərhədə yaxın mövqeyi ilə seçilirdi.

Uzun illərdir alimlər Vindonissanın tarixçəsi ilə bağlı mübahisələr aparırdılar. Xüsusilə, bu məntəqənin müvəqqəti düşərgədən daimi hərbi qalaya nə vaxt çevrildiyi dəqiq bilinmirdi. Son tapıntı isə Roma imperiyasının bölgədəki mövcudluğunun əvvəllər güman ediləndən daha erkən dövrə aid ola biləcəyini göstərir.

Hələlik dəqiq tarix müəyyənləşdirilməsə də, tədqiqatçılar Roma legionlarının bu ərazidə eramızın I əsrindən xeyli əvvəl yaxşı təchiz olunmuş baza yaratdıqlarını ehtimal edirlər.

Qeyd edək ki, bundan əvvəl İspaniyada iki min ildən çox yaşı olan və maye vəziyyətdə qalmış dünyanın ən qədim şərabının tapılması da elmi ictimaiyyətdə böyük marağa səbəb olmuşdu.

Telegramda izləyin