"NEW MED KLINIKA"da şəfa tapmaq olarmı?

Ölkədə özəl tibb sektorunda şəffaflıq və qanunlara əməl olunması dəfələrlə gündəmə gətirilsə də, bəzi klinikalar görünən odur ki, bu tələbləri açıq şəkildə görməzdən gəlməkdə davam edir. "NEW MED KLINIKA" ilə bağlı daxil olan məlumatlar isə vəziyyətin düşündüyümüzdən daha ciddi olduğunu göstərir.İddialara görə, klinikada fəaliyyət göstərməyən bəzi cərrahlar kənardan cəlb olunaraq heç bir rəsmi qeydiyyat olmadan əməliyyatlar həyata keçirirlər. Bu isə təkcə qanun pozuntusu deyil, eyni zamanda pasiyentlərin həyatı üçün açıq risk deməkdir. Tibbi fəaliyyətin qeydiyyatsız aparılması, sertifikatsız şəxslərin əməliyyat masasına buraxılması artıq səhlənkarlıq yox, sistemli özbaşınalıqdır.

Məlumata görə bununla yanaşı, klinikada çalışan bəzi işçilərlə əmək müqavilələrinin bağlanmaması faktı da əmək qanunvericiliyinin kobud şəkildə pozulduğunu göstərir. Vergidən yayınma iddiaları isə məsələnin maliyyə tərəfinin də qaranlıq olduğunu ortaya qoyur.Ən diqqətçəkən məqamlardan biri isə ödənişlərin böyük hissəsinin nağd şəkildə həyata keçirildiyinə dair iddialardır ki, bu da şəffaflığın bilərəkdən gizlədildiyi ehtimalını gücləndirir.
Bu cür halların davamlı xarakter alması artıq tək-tük pozuntu yox, sistemli problemlərin mövcudluğuna işarə edir. Sual yaranır: pasiyent təhlükəsizliyi kimə həvalə olunub? Müvafiq dövlət qurumlarının bu iddialara münasibəti niyə görünmür? Nəzarət mexanizmləri kağız üzərində qalırsa, vətəndaşların sağlamlığı necə qorunur?Səsləndirilən iddialar sadəcə bir klinikanın problemi deyil - bütövlükdə özəl səhiyyə sektorunda nəzarətsizlik və cəzasızlıq mühitinin formalaşdığını göstərir.
Davamı var
Qarşı tərəfin cavab haqqını tanıyırıq
Mediatvaz.com

Telegramda izləyin