"Azərbaycan Avropa ilə əlaqələrində selektiv və maraq əsaslı siyasətini davam etdirir" - AÇIQLAMA

"Prezident İlham Əliyev ilə Çexiyanın Baş naziri Andrey Babiş arasında keçirilən görüş və verilən mesajlar Bakı-Praqa xəttində münasibətlərin keyfiyyətcə yeni mərhələyə keçdiyini göstərir", - bunu Sonxeber.az -a açıqlama verən politoloq Tural İsmayılov deyib:

"Bu bəyanatın mərkəzində duran əsas məqam siyasi dialoqun intensivləşməsidir ki, bu da təsadüfi deyil. Azərbaycan son illər Avropa ilə münasibətlərində daha praqmatik və çoxşaxəli xətt yürüdür, Çexiya kimi sənaye və texnologiya potensialı olan ölkələrlə əməkdaşlıq isə bu strategiyanın mühüm hissəsidir.

Xüsusilə müdafiə sənayesi sahəsində vurğulanan əməkdaşlıq diqqət çəkir. Bu, sadəcə idxal münasibətlərindən çıxaraq birgə istehsal və texnologiya transferinə keçid deməkdir. Belə bir model Azərbaycanın müdafiə qabiliyyətini yalnız gücləndirmir, eyni zamanda yerli sənayenin inkişafına və strateji müstəqilliyin artmasına xidmət edir. Çexiyanın bu sahədəki təcrübəsi ilə Azərbaycanın artan istehsal imkanlarının sintezi regionda yeni sənaye əməkdaşlığı nümunəsi yarada bilər.

Digər tərəfdən, Hökumətlərarası Komissiyanın aktivləşdirilməsi və müntəzəm dialoq mexanizmlərinin qurulması münasibətlərin institusional əsasını möhkəmləndirir. Bu isə o deməkdir ki, əməkdaşlıq təkcə siyasi bəyanatlar səviyyəsində qalmayacaq, konkret layihələr və iqtisadi nəticələrə çevriləcək. Ümumilikdə, bu səfər və verilən mesajlar göstərir ki, Azərbaycan Avropa ilə əlaqələrində selektiv və maraq əsaslı siyasətini davam etdirir və bu kurs yaxın perspektivdə həm iqtisadi, həm də geosiyasi dividendlər vəd edir".

Telegramda izləyin