Dələduzluq qurbanı olan şəxs pulunu geri almaq üçün hansı addımları atmalıdır? - AÇIQLAMA

Müasir dövrdə dələduzluq halları həm onlayn platformalarda, həm də gündəlik münasibətlərdə daha çox rast gəlinən hüquq pozuntularından biridir.

Vətəndaşlar bəzən saxta elanlar, yalan vədlər, investisiya təklifləri, borc adı ilə pul alma halları və digər üsullarla maddi ziyana məruz qalırlar.

Bəs görəsən dələduzluq qurbanı olan şəxs pulunu geri almaq üçün hansı addımları atmalıdır?

Mövzu ilə bağlı hüquqşünas Xanım Yusifova bu barədə Sonxeber.az -a danışıb:

"İlk növbədə zərərçəkən şəxs bütün sübutları toplamalıdır. Buraya bank köçürmələri, qəbzlər, mesaj yazışmaları, səs qeydləri, müqavilələr, şahid ifadələri və digər materiallar daxildir. Çünki sonradan hüquq-mühafizə orqanlarına və ya məhkəməyə müraciət zamanı bu sənədlər mühüm əhəmiyyət daşıyır.

Daha sonra şəxs yaşayış yeri üzrə polis orqanına, prokurorluğa və ya elektron qaydada aidiyyəti dövlət qurumlarına ərizə ilə müraciət edə bilər. Ərizədə hadisənin necə baş verdiyi, pulun hansı üsulla alındığı, qarşı tərəfin kimliyi və mövcud sübutlar ətraflı göstərilməlidir. Azərbaycan Respublikası Cinayət Məcəlləsinə əsasən, etibardan sui-istifadə etmə və ya aldatma yolu ilə özgənin əmlakını ələ keçirmə dələduzluq əməli hesab olunur və cinayət məsuliyyəti yaradır.

Cinayət işi başlanıldığı halda zərərçəkmiş şəxs cinayət prosesi çərçivəsində mülki iddia qaldıraraq vurulmuş maddi ziyanın ödənilməsini tələb edə bilər. Əgər cinayət işi başlanmasa və ya məsələ mülki xarakter daşıyarsa, həmin şəxs birbaşa məhkəməyə müraciət edib pulun geri qaytarılması barədə iddia qaldıra bilər.

Əgər pul bank kartı vasitəsilə köçürülübsə, dərhal banka məlumat verilməsi də vacibdir. Bəzi hallarda şübhəli əməliyyatlarla bağlı araşdırma aparılması və müəyyən tədbirlərin görülməsi mümkündür.

Belə hallarda vaxtında müraciət etmək çox önəmlidir. Gecikmə sübutların itməsi, şəxsin gizlənməsi və vəsaitin başqa hesablara köçürülməsi riskini artırır. Buna görə də dələduzluqla üzləşən vətəndaş mümkün qədər tez hüquqi yardım almalı və rəsmi qaydada şikayət etməlidir".

Telegramda izləyin