"Mühitin təsiri altına düşən insanlarda empatiya hissi daha güclü olur" - AÇIQLAMA

İnsan ömrü boyu yüzlərlə insan tanıyır, müxtəlif mühitlərə daxil olur və fərqli münasibətlər qurur. Bəziləri ilə yollarımız ayrılır, bəziləri isə həyatımızda dərin iz buraxır. Ətrafımızdakı hər kəs istər-istəməz düşüncəmizə, davranışımıza və ruh halımıza müəyyən təsir göstərir.

Təəssüf ki, çox zaman müsbət təsirlərdən çox, bizi incidən və yoran münasibətləri daha çox yadda saxlayırıq.

Bəs niyə bəzi insanlar ətrafındakı şəxslərin həyatına mənfi təsir göstərməsinə imkan yaradır?

Mövzu ilə bağlı Sonxeber.az-a açıqlama verən psixoloq Aytən Ələkbərova bildirib ki, mühitin insana, eyni zamanda insanın da mühitə təsiri onun fərdi xüsusiyyətlərindən və psixoloji durumundan asılıdır.

Onun sözlərinə görə, insanlar bu baxımdan iki qrupa bölünür:

"Bir qrup insan var ki, mühiti idarə edir, digər qrup isə mühitin təsiri altında qalır. Mühiti idarə edən insanlar daxil olduqları çevrədə qısa zamanda özlərini qəbul etdirir, insanlarla münasibət qurur və müsbət enerji saçaraq diqqət çəkirlər. Onlar maraqlı fikir və düşüncələri ilə seçilir, ətrafdakılar tərəfindən sevilirlər.

Mühitin təsiri altına düşən insanlarda isə empatiya hissi daha güclü olur. Belə insanlar bəzən çox şən və pozitiv olsalar belə, düşdükləri mühitdə baş verən hadisələr onların əhvalına və psixoloji vəziyyətinə birbaşa təsir edir. Nəticədə onlar istər-istəməz çevrəyə uyğun davranmağa başlayırlar.

Məsələn, sərbəst və müstəqil böyümüş bir gənc qız daha mühafizəkar dəyərlərə sahib ailəyə gəlin gedə bilər. Həmin ailədə çoxsaylı qaydalar və məhdudiyyətlər varsa, zamanla o da həmin mühitə uyğunlaşmağa başlayır, davranışlarında və xarakterində dəyişikliklər yaranır. Bunun səbəbi çox vaxt cəmiyyətdə formalaşmış ənənəvi düşüncələrlə bağlı olur. ‘Ailə bir dəfə qurular’, ‘Ailə dağılmamalıdır’, ‘Övlad atasının yanında böyüməlidir’, ‘Düşdüyüm evin qaydalarına uyğun yaşamalıyam’ kimi fikirlər insanı öz istəklərini geri plana keçirməyə vadar edir.

Digər tərəfdən, bəzi insanlar isə bu qaydalarla razılaşmır və öz mövqeyini qorumağa çalışır. Bu zaman ailədaxili narazılıqlar, mübahisələr və münasibətlərdə gərginlik yaranır.

Bütün bunlar göstərir ki, insanın mühitə təsiri də, mühitin insana təsiri də onun xarakterindən, özünəinamından və psixoloji durumundan birbaşa asılıdır."

Telegramda izləyin