Tuneldə maşınların hərəkəti zamanı ayı peyda oldu - VİDEO

Türkiyənin Giresun şəhərində yerləşən Duroğlu tunelində maraqlı hadisə yaşanıb. Gecə saatlarında hərəkətdə olan avtomobilin qarşısına qəfil ayı çıxıb və bir müddət tunel boyunca maşının önündə qaçaraq irəliləyib.

Sonxeber.az xarici mediaya istinadən xəbər verir ki, hadisə Dereli-Giresun avtomobil yolunda qeydə alınıb. Sürücü ayını görən kimi sürətini azaldaraq ehtiyatla hərəkət etməyə davam edib. Görüntülərdə ayının panika vəziyyətdə tunelin içərisində qaçdığı, avtomobilin isə onu izlədiyi əks olunub.

Tunelin çıxışına qədər qaçan ayı daha sonra yol kənarındakı meşəlik əraziyə girərək gözdən itib. Maraqlı anlar avtomobildə olan şəxslər tərəfindən mobil telefon kamerası ilə lentə alınıb.

Bölgə sakinlərinin sözlərinə görə, son vaxtlar ayılar yaşayış məntəqələrinə daha tez-tez enməyə başlayıb. Xüsusilə kənd ərazilərində arı pətəklərinə hücumların artdığı, bəzi xırdabuynuzlu heyvanların da ayı hücumları nəticəsində tələf olduğu bildirilib.

Sakinlər gecə saatlarında kənd yollarında hərəkət edən sürücülərə diqqətli olmaları ilə bağlı xəbərdarlıq ediblər.

Telegramda izləyin