Bundan sonra gəlinlik seçmək üçün mağazalara giriş ödənişli olacaq

Bartında toy hazırlığı görən cütlüklərlə gəlinlik salonları arasında uzun müddətdir müzakirə olunan "gəlinlik sınaq haqqı" məsələsində ilk rəsmi addım atılıb. Şəhərdə gəlinliklərin sınaqdan keçirilməsi üçün ödəniş tətbiqi qanuni əsaslara salınaraq rəsmi qiymət cədvəlinə daxil edilib.

Sonxeber.az xarici mediaya istinadla xəbər verir ki, Bartın Dərzilər Palatası tərəfindən hazırlanan və Türkiyə Esnaf və Sənətkarları Konfederasiyası (TESK) tərəfindən təsdiqlənən yeni tarifə şəhərdə bu sahədə ilk rəsmi tənzimləmə kimi qiymətləndirilir.

Dərc olunan siyahıya əsasən, mağazalarda tətbiq edilə biləcək "Yeni gəlinliyin sınaq haqqı" üçün maksimum məbləğ 2 min Türkiyə lirəsi olaraq müəyyənləşdirilib. Bununla da gəlinlik sınaq haqqı rəsmi status qazanıb.

Qərar bütün gəlinlik salonlarının bu ödənişi məcburi şəkildə alacağı anlamına gəlmir. Müəyyən edilən 2 min lirə sahibkarların tətbiq edə biləcəyi ən yüksək məbləği ifadə edir. Bartındakı salonlar bu ödənişi tələb edib-etməməkdə sərbəstdirlər. Lakin sınaq haqqı almağı seçən və müəyyən edilən həddi aşan müəssisələrə qarşı qanuni tədbirlərin görüləcəyi bildirilib.

Buna baxmayaraq, qərar şəhərdə fəaliyyət göstərən gəlinlik salonları arasında fikir ayrılığı yaradıb. Tənzimləməyə etiraz edən bəzi sahibkarlar evlənməyə hazırlaşan cütlüklərin onsuz da ciddi maliyyə yükü altında olduqlarını vurğulayıblar.

Qərara qarşı çıxan salon sahibləri "Bartın kiçik şəhərdir, burada hər kəs bir-birini tanıyır. İnsanlardan əlavə olaraq 2 min lirə tələb etmək doğru deyil. Bu qərar müştərilərin mağazalardan uzaqlaşmasına səbəb olacaq" deyərək tətbiqi öz müəssisələrində həyata keçirməyəcəklərini bildiriblər.

Telegramda izləyin