"Yox" deməkdə çətinlik çəkən insanlar bu problemin öhdəsindən necə gələ bilərlər? - AÇIQLAMA

Müasir dövrdə bir çox insan başqalarını incitməmək, münasibətləri korlamamaq və ya mənfi qarşılanmamaq üçün "xeyr" deməkdə çətinlik çəkir.

Mütəxəssislər bildirirlər ki, daim başqalarının istəklərini öz ehtiyaclarından üstün tutmaq zamanla emosional yorğunluğa, stressə və özünə dəyər hissinin azalmasına səbəb ola bilər.

Bəs "yox" deməkdə çətinlik çəkən insanlar bu problemin öhdəsindən necə gələ bilərlər?

Psixoloq Gülsər Qədirli bu barədə Sonxeber.az -a açıqlama verib:

"Yox" deməkdə çətinlik çəkmək adətən insanın rədd edilmək qorxusu, başqalarının sevgisini və ya rəğbətini itirmək narahatlığı, həmçinin uşaqlıqdan formalaşan davranış modelləri ilə əlaqəli olur. Belə insanlar çox vaxt hər kəsi razı salmağa çalışır və öz ehtiyaclarını ikinci plana keçirirlər.

Bu problemin öhdəsindən gəlmək üçün ilk növbədə insan başa düşməlidir ki, "yox" demək eqoistlik deyil, şəxsi sərhədləri qorumaq bacarığıdır. Hər kəsin öz vaxtını, enerjisini və emosional resurslarını qorumaq hüququ var.

Kiçik situasiyalardan başlayaraq nəzakətli şəkildə imtina etməyi öyrənmək faydalıdır. Məsələn, uzun izahlar vermədən "Bu dəfə mümkün olmayacaq" və ya "Təşəkkür edirəm, amma qəbul edə bilməyəcəyəm" kimi ifadələrdən istifadə etmək olar.

İnsan həmçinin anlamalıdır ki, hər kəsi razı salmaq mümkün deyil. Sağlam münasibətlər qarşılıqlı hörmət üzərində qurulur və bir dəfə "yox" demək münasibətləri dağıtmamalıdır. Əgər münasibət yalnız davamlı güzəşt hesabına qorunursa, həmin münasibətin sağlam olub-olmadığını qiymətləndirmək lazımdır.

Daim özünü günahkar hiss etmək, sərhəd qoya bilməmək və ya başqalarının istəkləri qarşısında özünü məcbur hiss etmək halları həyat keyfiyyətinə ciddi təsir göstərirsə, psixoloq dəstəyi almaq faydalı ola bilər."

Telegramda izləyin