Türkiyə yığmasının baş məşqçisi komandaya səsləndi: "Başınızı dik tutun"

Türkiyə milli komandasının baş məşqçisi Vinçentso Montella uğursuzluqla üzləşən futbolçularına dəstək olaraq, onlardan başlarını dik tutmalarını tələb edib.

Oxu.Az Türkiyə mətbuatına istinadən xəbər verir ki, italiyalı mütəxəssis bu fikirləri DÇ-2026-nın qrup mərhələsi çərçivəsində Paraqvaya qarşı baş tutan gərgin qarşılaşmadan sonra səsləndirib:

"Mən həqiqətən çox üzgünəm. Bütün Türkiyə xalqının bizdən böyük gözləntiləri var idi və bu inamı biz də paylaşırdıq. Türkiyə Futbol Federasiyası adından da dərin məyusluq hissi keçirirəm, çünki onların necə fədakar çalışdıqlarının şahidiyəm. Eyni zamanda, futbolçuların da necə böyük əziyyət çəkdiklərini bilirəm. Düz 35 ildir ki, futbol dünyasındayam. Belə bir vəziyyət bəlkə də 50 ildə bir dəfə yaşanar, ancaq bizim başımıza cəmi iki oyunda gəldi. Təsəvvür edin, iki matç ərzində rəqib qapısına 65 zərbə endirmişik. Topa sahib olma faizimizdən isə heç danışmağa dəyməz. Görünür, tale bu dəfə bizim yanımızda deyildi. Mən futbolçularımıza bildirdim ki, başlarını dik tutsunlar. Bəzən deyildiyi kimi, qismətdən qaçmaq mümkün deyil.

Mənim üçün ən önəmlisi futbolçularımızın meydandakı çalışqanlığı və qələbə əzmidir. Onların meydandakı ruhuna, mübarizə aparmaq istəyinə xüsusi diqqət yetirirəm. Komandanın hər bir üzvündə inanılmaz bir ehtiras və həvəs var idi. Hər iki qarşılaşmada son saniyəyə qədər vuruşdular. Buna görə də onlara hər zaman arxa duracağam. Heç kim öz məsuliyyətindən qaçmadı, hər kəs bütün gücünü ortaya qoyaraq əsl mübarizə nümayiş etdirdi. Çox təəssüf ki, bu dəfə istədiyimiz nəticəni əldə edə bilmədik".

Xatırladaq ki, Türkiyə yığması D qrupunda keçirdiyi ikinci sınağında Paraqvay komandasına 0:1 hesabı ilə məğlub olub. Qeydə alınan bu nəticədən sonra "ay-ulduzlular"ın dünya çempionatında növbəti mərhələyə vəsiqə qazanmaq şanslarını birdəfəlik itirdiyi rəsmiləşib.

Telegramda izləyin