Türkiyə tarixinin ən böyük əməliyyatı! 10 min tarixi əsər ələ keçirildi - VİDEO

İstanbulun Beykoz rayonunda tarixi əsər qaçaqmalçılarına qarşı keçirilən əməliyyat zamanı 10 min 185 ədəd tarixi əsər aşkarlanaraq müsadirə edilib.

Sonxeber.az xarici mediaya istinadla xəbər verir ki, İstanbul Polis İdarəsinin Qaçaqmalçılıqla Mübarizə Şöbəsinin əməkdaşları tərəfindən həyata keçirilən əməliyyat çərçivəsində tarixi əsərlərin qanunsuz dövriyyəsi ilə məşğul olmaqda şübhəli bilinən 2 nəfər saxlanılıb.

Şübhəlilərin yaşadığı ünvanda aparılan axtarış zamanı 6 min 819 arxeoloji əşya və müxtəlif tarixi artefakt, eləcə də 3 min 366 qədim sikkə olmaqla ümumilikdə 10 min 185 parça tarixi əsər aşkar edilib.

Mütəxəssislərin ilkin araşdırmasına görə, tapılan eksponatlar Anadolu Səlcuqlu, Böyük Səlcuqlu, Het, Urartu, Yunan, Roma, Bizans, Assuriya, Mesopotamiya, Əməvi, Abbasi və Osmanlı dövrləri də daxil olmaqla 12 müxtəlif sivilizasiyaya aiddir.

Tarixi və mədəni dəyəri yüksək qiymətləndirilən əsərlər müvafiq muzey qurumlarına təhvil verilib. Saxlanılan şəxslər isə ifadələri alındıqdan sonra məhkəmə orqanlarının qərarı ilə sərbəst buraxılıb.

Qeyd olunur ki, bu əməliyyat İstanbul polisinin son illərdə tarixi əsər qaçaqmalçılığına qarşı keçirdiyi ən böyük əməliyyatlardan biri hesab edilir.

Telegramda izləyin