Həyat yoldaşından halallıq istəyən 28 yaşlı kişi ölü tapıldı - VİDEO

Türkiyənin Aksaray vilayətində həyat yoldaşına halallıq istədiyini bildirən mesaj göndərdikdən sonra itkin düşən 28 yaşlı Selahattin Ç. dağlıq ərazidə başından güllə yarası almış vəziyyətdə ölü tapılıb.

Sonxeber.az xarici mediaya istinadla xəbər verir ki, hadisə Aksarayın mərkəzinə bağlı Akın kəndi yaxınlığındakı dağlıq ərazidə baş verib.

Məlumata görə, psixoloji sarsıntı keçirdiyi bildirilən Selahattin Ç. həyat yoldaşına göndərdiyi mesajda halallıq istəyib və bundan sonra yoxa çıxıb.

Mesajı alan qadın dərhal təcili tibbi yardım xidmətinə məlumat verib. Bundan sonra polis əməkdaşları gəncin gedə biləcəyi istiqamətlərdə genişmiqyaslı axtarışlara başlayıb. Bir gün davam edən axtarışlara baxmayaraq, onun yerini müəyyənləşdirmək mümkün olmayıb.

Gecə saatlarında heyvan sığınacağında çalışan mühafizəçi dağlıq ərazidə sahibsiz motosiklet görərək vəziyyətdən şübhələnib və aidiyyəti qurumlara məlumat verib. Hadisə yerinə gələn jandarma əməkdaşları motosikletdən təxminən 50 metr aralıda yerdə uzanmış kişi meyiti aşkar ediblər.

Hadisə yerinə çağırılan tibb işçiləri şəxsin həyatını itirdiyini təsdiqləyiblər. İlkin araşdırma zamanı onun baş nahiyəsindən odlu silahla vurulduğu müəyyən edilib. Meyitin yaxınlığında bir tapança və çoxsaylı boş patron gilizləri aşkarlanıb.

Hadisə polis ərazisində baş verdiyi üçün araşdırma Aksaray Polis İdarəsinin Cinayət Axtarış və Hadisə Yeri Araşdırma şöbələrinin əməkdaşlarına təhvil verilib. Faktla bağlı istintaq davam edir, əsas versiyalardan biri kimi intihar ehtimalı nəzərdən keçirilir.

Telegramda izləyin