Məzuniyyətdən sonra yenə yorğunsunuz? - Ekspert əsl səbəbi açıqladı

Əgər insan məzuniyyətdən qayıtdıqdan sonra özünü elə səfərə çıxdığı gündəki kimi yorğun hiss edirsə, bu, heç də həmişə istirahətin qısa olması ilə bağlı olmur.

Oxu.Az Gazeta.ru-ya istinadən xəbər verir ki, bunu rusiyalı biznes-psixoloq, iqtisad elmləri namizədi Yekaterina Katalina bildirib.

Onun sözlərinə görə, tədqiqatlar göstərir ki, məzuniyyət insanın gümrahlığını artırsa da, adi iş rejiminə qayıtdıqdan sonra bu effekt qısa müddətdə itir. Ən çox yol verilən səhvlərdən biri isə istirahəti növbəti "iş layihəsi"nə çevirməkdir.

"İnsan özünə sərt marşrut planı tərtib edir, bir həftə ərzində bütün görməli yerləri gəzməyə çalışır, reytinqləri yoxlayır, eyni vaxtda beş ekskursiya sifariş edir. Formal olaraq o, ofisdə deyil, lakin daxilən tamamilə iş rejimindədir: planlaşdırır, nəzarət edir və nəticəni qiymətləndirir", - deyə Katalina izah edib.

Ekspert bildirib ki, ikinci səbəb isə işin insanı psixoloji cəhətdən rahat buraxmamasıdır. İnsan çimərlikdə uzansa belə, fikrində hələ də elektron məktubları cavablandırır. Əgər növbəti iş günü ilə bağlı düşüncələr səfərin ən gözəl anlarında belə istirahəti kölgədə qoyursa, problem artıq xroniki gərginlikdən qaynaqlanır.

Daha bir, az nəzərə çarpan səbəb isə insanın alışdığı sosial rolun müvəqqəti itirilməsidir. İş prosesində insan özünü mütəxəssis, rəhbər və ya komanda üzvü kimi dəqiq müəyyənləşdirir. Məzuniyyət zamanı isə bu dayaqlar müvəqqəti olaraq aradan qalxır.

Məzuniyyətin tükənmişlik hissi ilə başa çatmaması üçün ekspert uçuşdan dərhal sonra işə başlamamağı tövsiyə edir.

"Yaxşı olar ki, evdə bir neçə gün keçirəsiniz: əşyaları yerbəyer etmək, doyunca yatmaq və gündəlik rejimə tədricən qayıtmaq üçün. Əgər axşam təyyarədən düşüb, səhər artıq onlayn iclasa qoşulursunuzsa, orqanizmə uyğunlaşmaq üçün demək olar ki, vaxt vermirsiniz", - deyə o bildirib.

Yekaterina Katalinanın sözlərinə görə, məzuniyyətin optimal müddəti təxminən iki həftədir. Bu müddət ərzində həm kifayət qədər dincəlmək, həm də iş ritmindən tamamilə uzaqlaşmamaq mümkündür. İstirahət 10 gündən az olduqda insan yeni rejimə tam uyğunlaşa bilmir. Həddindən artıq uzun məzuniyyətdən sonra isə yenidən iş intizamına qayıtmaq daha çətin olur.

Ekspert işdə hələ də zövq aldığınız məqamları - maraqlı tapşırıqları, kollektivlə ünsiyyəti və faydalılıq hissini xatırlamağı tövsiyə edir. Lakin insan hətta məzuniyyət günlərində belə bazar ertəsini qorxu ilə gözləyirsə, bu halda heç bir istirahət problemi həll etməyəcək.

"Bəzən məzuniyyət insanı bərpa etmir. Bunun səbəbi istirahətin pis keçməsi deyil, insanın onu daim tükəndirən bir mühitə geri qayıtmasıdır", - deyə ekspert yekunlaşdırıb.

Telegramda izləyin