İflic həyat yoldaşına görə milçəklərlə mübarizə aparan qadın yardım istədi

Türkiyənin Aydın vilayətinin Koçarlı rayonunda yaşayan 57 yaşlı Öznur Evren milçək və həşərat probleminin həyatlarını kabusa çevirdiyini bildirərək aidiyyəti qurumlardan ərazidə dərmanlama aparılmasını istəyib.

Sonxeber.az xarici mediaya istinadla xəbər verir ki, Şenköy məhəlləsində yaşayan qadın yatağa bağlı iflic həyat yoldaşının milçəklər səbəbindən böyük əziyyət çəkdiyini bildirib. O, həyat yoldaşının rahatlığı üçün gecə-gündüz onun başında dayanaraq milçəklərdən qorumağa çalışdığını deyib.

Öznur Evrenin sözlərinə görə, 68 yaşlı həyat yoldaşı Eşref Evren 2013-cü ildə keçirdiyi insult nəticəsində hərəkət və danışıq qabiliyyətini itirib, yatağa bağlı vəziyyətə düşüb.

Qadın bildirib ki, bu il yay aylarında vəziyyət daha da çətinləşib. Evlərinin qarşısına zibil konteynerlərinin qoyulması və ərazidə dərmanlama işlərinin aparılmaması səbəbindən milçəklərin artdığını deyən Evren, həyat yoldaşının hərəkət edə bilmədiyi üçün üzərinə qonmuş həşəratları uzaqlaşdıra bilmədiyini vurğulayıb.

"Gecə-gündüz onun başında milçək növbəsi çəkirəm. Öz imkanlarımla pəncərələrə tor çəkmişəm. Aylardır bir əlimdə milçək dərmanı, digər əlimdə milçəköldürənlə mübarizə aparıram", - deyə Öznur Evren bildirib.

O, əvvəllər ərazidə mütəmadi dərmanlama aparıldığını və belə problemlə qarşılaşmadıqlarını qeyd edib. Qadın aidiyyəti qurumlardan problemin həlli üçün kömək göstərilməsini və ərazidə dərhal dezinfeksiya tədbirlərinin görülməsini xahiş edib.

Telegramda izləyin