Cinsi istismara məruz qalan gənc qızın zorla qaçırıldığı iddia edilir

Türkiyənin İstanbul şəhərində cinsi istismar işi üzrə məhkəmə prosesi davam edən hadisə ilə bağlı yeni iddialar ortaya çıxıb.

Sonxeber.az xarici mediaya istinadla xəbər verir ki, təqsirləndirilən R.H.U. qərar iclasına iki ay qalmış zərərçəkmiş E.Ö.-nü zorla avtomobilə mindirərək Antalyaya aparıb.

Məlumata görə, R.H.U. 2024-cü ildə onlayn oyun platformasında tanış olduğu, həmin vaxt 16 yaşı olan E.Ö.-yə cinsi istismarda ittiham olunur. Onun barəsində "uşağın ağırlaşdırılmış cinsi istismarı" maddəsi ilə 20 ilədək həbs cəzası tələbi ilə məhkəmə işi açılıb.

Zərərçəkənin anası Nagihan Solak bildirib ki, qarşı tərəfin barışıq təklifini qəbul etməyiblər və şikayətlərindən imtina etməyiblər. Onun sözlərinə görə, qızı epilepsiya xəstəsidir və hadisədən sonra dərmanlarını belə ala bilməyib.

İddialara əsasən, E.Ö. iyulun 2-də marketə getmək üçün evdən çıxıb və həmin vaxt R.H.U. ilə birlikdə olan şəxslər tərəfindən zorla avtomobilə mindirilərək Antalyaya aparılıb.

Hadisə ilə bağlı araşdırma davam edir.

Telegramda izləyin