"Ukraynada enerji obyektlərimizin və diplomatik nümayəndəliklərinin vurulmasının heç bir bəhanəsi ola bilməz" - Deputat

"Azərbaycanın Ukraynadakı enerji obyektləri və digər mülkiyyətinin təhlükəsizliyi təmin edilməlidir. Enerji obyektlərimizin və Azərbaycanın diplomatik nümayəndəliklərinin vurulmasının heç bir bəhanəsi ola bilməz".

Bunu Sonxeber.az-a danışan Milli Məclisin deputatı Müşfiq Məmmədli bildirib.

Deputat qeyd edib ki, Rusiya tərəfindən Ukraynanın Mikolayiv vilayətində yerləşən SOCAR yanacaqdoldurma məntəqəsinə dron hücumu ilə bağlı Rusiyanın Azərbaycandakı səfiri Xarici İşlər Nazirliyinə dəvət olunaraq ona kəskin etiraz notası təqdim edilməsi ölkəmiz tərəfindən atılan haqqlı addımdır:

"Bu, Azərbaycanın öz dövlət maraqları ilə yanaşı həm də xaricdə yerləşən mülkiyyətini qorumaq baxımından beynəlxalq hüquqa uyğun addımdır. Rusiyanın dron hücumları nəticəsində Ukraynada Azərbaycanın obyektlərinin zərər görməsi ilk hal deyil. Bu cür addımların təkrarlanması bizdə müəyyən sualların yaranmasına səbəb olur.

Son dövrlərdə Ukrayna pilotsuz uçuş aparatları vasitəsilə Rusiyanın enerji infrastrukturu və neft emalı müəssisələrinə intensiv zərbələr endirir. Bu hücumlar Rusiyada yanacaq təminatına və logistika imkanlarına müəyyən təsirlər göstərib. Rusiya da öz növbəsində Ukraynanın enerji və yanacaq infrastrukturunu, o cümlədən yanacaqdoldurma məntəqələrini hədəfə alır. Hər iki ölkə bir-birinin strateji və iqtisadi əhəmiyyət daşıyan obyektlərini sıradan çıxarmağa çalışırlar.Amma bu Azərbaycana məxsus mülki obyektlərin hədəfə alınmasına bəraət qazandıra bilməz".

Deputat vurğulayıb ki, Azərbaycanın diplomatik nümayəndəliklərinin və milli şirkətlərinə məxsus obyektlərin təhlükəsizliyi hər iki ölkə tərəfindən beynəlxalq hüququn normaları çərçivəsində qorunmalıdır. Bununla bağlı hər iki ölkənin beynəlxalq hüquqla tənzimlənən öhdəlikləri mövcuddur:

"Bu baxımdan Azərbaycanın Rusiyaya etiraz notası təqdim etməsi düzgün və prinsipial mövqedir. Hesab edirəm ki, bu nota Rusiya tərəfindən diqqətlə araşdırılacaq və aidiyyəti dövlət qurumları tərəfindən nəzərə alınacaq. Əks təqdirdə Rusiya tərəfindən bu cür addımların təkrarlanması hər iki ölkə arasında münasibətlərə mənfi təsir göstərə bilər".

Telegramda izləyin