Yaşayış bölgəsində güclü partlayış səsi təşviş yaradıb: Səbəbi araşdırılır - VİDEO

Türkiyənin Giresun vilayətinin Görele rayonuna bağlı Umutlu və Karakeş kəndlərində eşidilən güclü partlayış səsi sakinlər arasında təşvişə səbəb olub.

Sonxeber.az xarici mediaya istinadla xəbər verir ki, hadisədən sonra vətəndaşlar vəziyyətlə bağlı 112 Təcili Çağırış Mərkəzinə məlumat veriblər. Əraziyə cəlb olunan jandarma əməkdaşları partlayış səsinin mənbəyini müəyyənləşdirmək üçün kəndlərdə və ətraf ərazilərdə genişmiqyaslı araşdırmalara başlayıblar.

İlkin baxış zamanı partlayışa səbəb ola biləcək hər hansı obyekt aşkar edilməyib. Hadisənin başvermə səbəbi ilə bağlı araşdırmalar davam etdirilir.

Bəzi sakinlər partlayışdan sonra evlərin silkələndiyini, həmçinin göydən konfeti parçalarını xatırladan xırda hissəciklərin düşdüyünü iddia ediblər.

Bildirilib ki, güclü səs təkcə Umutlu və Karakeş kəndlərində deyil, Tirebolu, Kovanpınar, Işıklı, Karlı və Doğancı yaşayış məntəqələrində də eşidilib.

Hadisə ilə bağlı rəsmi açıqlama verilməsə də, ilkin ehtimallara görə, partlayışa səbəb olan cismin hava aparatı, o cümlədən pilotsuz uçuş aparatı ola biləcəyi bildirilir. Onun mənşəyi və hadisənin dəqiq səbəbi ilə bağlı araşdırmalar davam edir.

Telegramda izləyin