Kuryer şirkətinin avtomobilini yandırmağa cəhd edən şəxs saxlanılıb - VİDEO

Türkiyənin Aksaray şəhərində evinin qarşısında avtomobil park edilməsinə etiraz edən 35 yaşlı şəxs kuryer şirkətinə məxsus yük avtomobilinin təkərlərini kəsərək onu yandırmağa cəhd edib.

Sonxeber.az xarici mediaya istinadla xəbər verir ki, Selçuk bulvarında yaşayan Şaban A. daha əvvəl yük avtomobilinin sürücüsü ilə evinin qarşısında park məsələsinə görə mübahisə edib. Avtomobil yenidən həmin əraziyə park edildikdən sonra o, bıçaqla yük maşınının təkərlərini kəsib.

Daha sonra özü ilə gətirdiyi dizel yanacağını təkərlərin üzərinə tökərək avtomobili yandırmaq istəyən şəxs ətrafdakıların polisə məlumat verməsindən sonra hadisə yerinə gələn hüquq-mühafizə əməkdaşlarını görərək planını həyata keçirə bilməyib.

Polisin araşdırmaları davam edərkən, şübhəli bir müddət sonra hadisə yerini müşahidə etdiyi vaxt saxlanılıb. Üzərində axtarış aparıldıqdan sonra o, ifadəsinin alınması üçün polis bölməsinə aparılıb.

Faktla bağlı Aksaray Respublika Baş Prokurorluğunun göstərişi ilə araşdırma başladılıb.

Telegramda izləyin