Metroda qadına qarşı əxlaqsız hərəkət iddiası! - VİDEO

İstanbul metrosunda baş verdiyi bildirilən xoşagəlməz hadisə sosial şəbəkələrdə geniş rezonans doğurub.

Sonxeber.az xarici mediaya istinadla xəbər verir ki, Maltepe stansiyası yaxınlığında bir kişi sərnişin vaqonda qarşısında əyləşən qadına yönələrək əxlaqsız hərəkətlər edib.

Məlumata əsasən, ağ köynək və qara şalvar geyinmiş şəxsin qadına uzun müddət baxdığı və geyimi üzərindən cinsi xarakterli uyğunsuz hərəkətlər etdiyi iddia olunur. Bildirilir ki, qatar stansiyada dayandığı və qapılar açıldığı vaxt da həmin şəxs davranışlarını davam etdirib.

Hadisənin zərərçəkmişi olduğu deyilən qadın baş verənləri mobil telefonunun kamerası ilə lentə alıb. Daha sonra sosial şəbəkələrdə yayılan görüntülərdə şəxsin üzü məxfilik məqsədilə bulanıqlaşdırılıb.

Videonun yayılmasının ardından sosial media istifadəçiləri hadisəyə kəskin reaksiya göstərərək, şübhəlinin kimliyinin müəyyənləşdirilməsi və qanunvericiliyə uyğun şəkildə məsuliyyətə cəlb olunması üçün aidiyyəti qurumlara çağırış ediblər.

Hadisə ilə bağlı rəsmi qurumlar tərəfindən hələlik açıqlama verilməyib.

Telegramda izləyin