Azyaşlı övladlarının gözü qarşısında bıçaqla onu döyən ərindən şikayətçi olmadı - VİDEO

Türkiyənin Hatay vilayətində ailədaxili zorakılıq hadisəsi baş verib. Ayrılmaq istədiyi həyat yoldaşı tərəfindən azyaşlı övladlarının gözü qarşısında bıçaqla təhdid edilərək döyüldüyü bildirilən qadının əri məhkəmə qərarı ilə həbs olunub.

Sonxeber.az xarici mediaya istinadla xəbər verir ki, hadisə Kırıxan rayonunun Alsancak məhəlləsində yerləşən konteyner yaşayış məntəqəsində qeydə alınıb. İddialara əsasən, 34 yaşlı H.Y. əlində bıçaqla 24 yaşlı həyat yoldaşı S.Y.-ni yerə yıxaraq azyaşlı övladlarının gözü qarşısında döyüb. Hadisənin görüntülərinin mobil telefonla qeydə alınaraq yayılmasından sonra polis araşdırmaya başlayıb.

Hüquq-mühafizə orqanlarının keçirdiyi əməliyyat nəticəsində H.Y. qısa müddətdə saxlanılıb. O, polis bölməsindəki prosedurlar başa çatdıqdan sonra məhkəməyə çıxarılıb və "qəsdən sağlamlığa zərər vurma" və "şəxsi qanunsuz olaraq azadlıqdan məhrum etmə" ittihamları ilə barəsində həbs qətimkan tədbiri seçilib.

Zərərçəkmiş S.Y. ifadəsində bildirib ki, həyat yoldaşı ilə boşanma mərhələsindədir. Onun sözlərinə görə, H.Y. əvvəlcə dərman qəbul edərək intihara cəhd edib, daha sonra isə onu döyərək evdən çıxmasına mane olub.

Məlumata görə, qadın baş verən hadisəyə baxmayaraq, üç övladının atası olan həyat yoldaşından rəsmi şəkildə şikayətçi olmayıb. Bununla belə, hadisə ilə bağlı istintaq davam etdirilir.

Telegramda izləyin