"Uşaqlara sosial şəbəkələrdə qeydiyyatına məhdudiyyət qoyulması qoruyucu xarakter daşıyır" - DEPUTAT

"Uşaqların sosial şəbəkələrdən istifadəsi Azərbaycanda qanunvericiliklə tənzimlənir. 16 yaşına çatmayan şəxslərin sosial şəbəkələrdə fərdi hesab açması qadağan edilir, 16-18 yaş arası yeniyetmələr isə qeydiyyatdan yalnız valideyn və ya qanuni nümayəndələrinin razılığı ilə keçə bilərlər. Bu qərar uşaqların sosial şəbəkələrdə üzləşə biləcəyi kiberzorakılığın qarşını alacaq".

Bunu Sonxeber.az-a danışan deputat Sevinc Hüseynova bildirib.

Deputat qeyd edib ki, sosial şəbəkələrin uşaqların psixologiyasına mənfi təsirlərinin qarşısını almaq və rəqəmsal mühitdə təhlükəsizliyini təmin etmək məqsədilə qabaqcıl dünya təcrübəsi nəzərə alınaraq ciddi yaş məhdudiyyətləri tətbiq olunur:

"Platformalar istifadəçilərin yaşını təsdiqləmək üçün mobil nömrə və ya digər müvafiq yoxlama sistemləri tələb edəcəkdir.Qanuni məhdudiyyətlərlə yanaşı, ev şəraitində də uşaqların rəqəmsal savadlılığının artırılması vacibdir. Valideynlər mütləq şəkildə cihazlarda "Valideyn Nəzarəti" funksiyalarını aktivləşdirməli və uşaqların internetdə keçirdiyi vaxtı məhdudlaşdırmalıdırlar.Dəyişikliklər aşağı yaş qruplarının zərərli təsirlərdən qorunması baxımından mühüm addımdır. Sosial şəbəkələr gündəlik ünsiyyət, təhsil və məlumat əldə etmək üçün əvəzolunmazdır. Lakin rəqəmsal asılılıq, kiberzorakılıq və şəxsi məlumatların təhlükəsizliyi kimi risklərdən qorunmaq üçün onlardan məqsədyönlü və təhlükəsiz istifadə qaydalarına riayət etmək vacibdir. Xüsusilə də uşaqların.

Sosial şəbəkələr gündəlik ünsiyyət, təhsil və məlumat əldə etmək üçün əvəzolunmazdır. Lakin rəqəmsal asılılıq, kiberzorakılıq və şəxsi məlumatların təhlükəsizliyi kimi risklərdən qorunmaq üçün onlardan məqsədyönlü və təhlükəsiz istifadə qaydalarına riayət etmək vacibdir".

Deputat vurğulayıb ki, daimi onlayn olmaq uşaqlarda tənhalıq hissi, depressiya və narahatlıq riskini artırır:

"Uşaqlar sosial şəbəkələrdə təzyiqə, təhqirə və ya hədə-qorxuya məruz qala bilərlər. Real ünsiyyətdən və fiziki aktivlikdən uzaqlaşma, həmçinin yuxu rejiminin pozulması müşahidə olunur. Şəxsi məlumatların və fotoların oğurlanması təhlükəsi mövcuddur. Bəzi ölkələrdə yaş həddi 15-16 olaraq müəyyən edilir və bu yaşdan kiçiklər üçün valideyn icazəsi tələb olunur. Uşaqların sosial şəbəkələrdə qeydiyyatına məhdudiyyət qoruyucu xarakter daşıyır. Azərbaycanın da bu istiqamətdə atdığı addım gələcək nəslin sağlam inkişafının təmin olunmasına xidmət edir. Xüsusilə də, uşaqların təhlükəsiz informasiya mühitində formalaşmasına və rəqəmsal dünyaya daha hazırlıqlı şəkildə inteqrasiyasına xidmət edir. Bir sözlə 16 yaşa qədər uşaqlara sosial şəbəkələrdə qeydiyyatına məhdudiyyət qoyulması uşaqların sosial şəbəkələrdən istifadəsinə dair yeni hüquqi tənzimləmələr məhdudlaşdırıcı deyil, qoruyucu xarakter daşıyır".

Telegramda izləyin