Məscidin nəzir qutusunu qırıb,100 min oğurladı - VİDEO

Türkiyənin Bursa vilayətinin İnegöl rayonunda yerləşən məscidlərdən birində nəzir qutusunu sındıran naməlum şəxs təxminən 100 min türk lirəsini oğurlayaraq hadisə yerindən qaçıb.

Sonxeber.az xarici mediaya istinadla xəbər verir ki, hadisə səhər saat 07:00 radələrində Fatih məhəlləsində yerləşən Yokuşlar məscidində baş verib. Məlumata görə, məscidə daxil olan şübhəli əvvəlcə ayaqqabılarını girişdə çıxarıb, daha sonra bir müddət məscidin içərisində gəzib. Nəzir qutusunu görən şəxs əvvəlcə onun kilidlərini açmağa çalışsa da, buna nail olmayıb.

Bundan sonra o, məsciddən çıxaraq küçədən səki daşı götürüb və yenidən içəri daxil olub. Təxminən 15 dəqiqə ərzində daşla qutunun kilidlərini sındıran şübhəli, içərisində son iki ay ərzində toplanmış təxminən 100 min lirə məbləğində ianəni məsciddə tapdığı plastik torbaya dolduraraq hadisə yerindən uzaqlaşıb.

Bir müddət sonra məscidə gələn imam və dərnək rəhbərləri nəzir qutusunun sındırıldığını aşkar edərək polisə məlumat veriblər. Hadisə yerinə cəlb olunan polis və kriminalistlər araşdırmalara başlayıb, təhlükəsizlik kameralarının görüntüləri götürülüb.

Hazırda polis oğurluqda şübhəli bilinən şəxsin kimliyinin müəyyən edilərək saxlanılması istiqamətində əməliyyat-axtarış tədbirlərini davam etdirir.

Telegramda izləyin