DÇ-2026-nın finalöncəsi "sehrli foto"

İspaniya və Argentina yığmalarının qarşılaşacağı 2026-cı il dünya çempionatının həlledici final matçı ərəfəsində Kataloniyanın "Barselona" klubunun mətbuat xidməti maraqlı bir tarixi faktı yenidən gündəmə gətirib.
Sonxeber.az Oxu.az-a istinadən xəbər verir ki, qurum Lionel Messinin körpə Lamin Yamalı vannada çimdirdiyi məşhur anı xatırladıb.

Kataloniyalıların mətbuat xidməti Messi və balaca Yamalın yer aldığı sözügedən şəkli paylaşıb və onu "sehrli foto" adlandırıb.
Tarixə nəzər salsaq görərik ki, 2007-ci ildə İspaniyanın "Diario Sport" nəşri "Barselona"nın ovaxtkı sponsoru UNICEF ilə birlikdə Kataloniya klubunun azarkeşləri üçün xüsusi bir uduşlu kampaniya təşkil etmişdi. Şərtlərə görə, qalib gələn ailənin övladı "Barselona" ulduzları ilə birlikdə təqvim üçün çəkilməli idi.

Həmin uduş Afrika ölkələrindən gəlmiş iki mühacirin və onların altıaylıq oğlu Lamin Yamalın yaşadığı ərazidə keçirilirdi. Tale elə gətirdi ki, qalib məhz bu ailə oldu. Nəticədə ailə "Kamp Nou" stadionuna gəlmək şansı qazandı və orada onları o zaman futbolun parlayan ulduzu olan Lionel Messi ilə unudulmaz bir fotosessiya gözləyirdi.

Təxminən iyirmi il sonra bu iki ulduz futbolçunun qarşıdurması DÇ-2026-nın final matçının əsl bəzəyinə çevriləcək. Bu həlledici görüşü təkcə dünya futbol ictimaiyyəti deyil, Yamalın özü də böyük səbirsizliklə gözləyir.

"Mən bir az böyümüşəm, Leo da, həmçinin. Ümid edirəm ki, onunla finalda qarşılaşa biləcəyəm, xüsusən də Finalissimanın (Cənubi Amerika və Avropanın ən yaxşı yığmalarının matçı) baş tutmadığını nəzərə alsaq", - deyə Yamal bildirib.

Xatırladaq ki, ispanlar DÇ-2026-nın 1/2 final mərhələsində Fransa yığması üzərində inamlı qələbə (2:0) qazanaraq finala vəsiqə əldə ediblər. Pley-off mərhələsi boyunca Luis de la Fuentenin rəhbərlik etdiyi komanda Belçika (2:1), Portuqaliya (1:0) və Avstriya (3:0) seçmələrinə də qalib gəlməyi bacarıb.

İspaniya - Argentina qarşılaşması iyulun 19-da, bazar günü "MetLayf" stadionunda baş tutacaq. Oyunun start fiti Bakı vaxtı ilə saat 23:00-da səslənəcək.

Telegramda izləyin