İstirahət kompleksində yüksək qiymətlər narazılıq yaratdı: "Gəlməyin, vəziyyət dəhşətlidir" - VİDEO

Türkiyənin İzmir vilayətinin məşhur istirahət məkanı Alaçatıda dincələn bir turist sosial şəbəkədə paylaşdığı video ilə bölgədəki yüksək qiymətlərə etiraz edib. O, gündəlik qida və digər xərclərin həddindən artıq bahalaşdığını bildirərək digər turistlərə xəbərdarlıq edib.

Bu barədə Sonxeber.az xarici mediaya istinadla xəbər verir.

Turistin sözlərinə görə, lüks restoranlarda yüksək qiymətlərin olmasını normal hesab etsə də, adi yemək və içkilərin qiymətləri də nəzarətdən çıxıb. O bildirib ki, bir sendviçin qiyməti 670 TL, bir porsiya kartof fri 375 TL, limon qabığında təqdim olunan dondurma isə 500 TL-dir. Həmçinin pomidorlu makaronun 300 TL, sadə tostun isə 500 TL olduğunu qeyd edib.

Paylaşım müəllifi bildirib ki, təyyarədən enib Alaçatıya gəldiyi ilk gün saat 15:00-a qədər ümumilikdə 3 500 TL xərcləyib. O, Antalya və Bodrumda da istirahət etdiyini xatırladaraq, Alaçatıdakı qiymət siyasətini "dəhşətli" adlandırıb və "Alaçatıya gəlməyin, vəziyyət çox pisdir" sözləri ilə narazılığını ifadə edib.

Video sosial şəbəkələrdə geniş yayılıb və istifadəçilər arasında bölgədəki yüksək qiymətlərlə bağlı müzakirələrə səbəb olub.

Telegramda izləyin