"Bu, Prezident İlham Əliyevin uzaqgörən siyasətinin Avropa miqyasında konkret nəticələr verməsinin bariz nümunəsidir"

Azərbaycan-Almaniya Biznes Şurasının yaradılması təkcə iqtisadi əməkdaşlıq mexanizmi deyil, həm də iki ölkə arasında strateji tərəfdaşlığın institusional çərçivəyə salınmasıdır. Bu addım Azərbaycan Prezidenti İlham Əliyevin Almaniyaya rəsmi səfərinin ən mühüm nəticələrindən biri kimi ölkəmizin Avropa ilə münasibətlərində yeni uğurlu mərhələyə yol açır.
Buradakı institusional dialoq dövlət qurumları ilə özəl sektor arasında sistemli əməkdaşlıq mexanizmi formalaşdırır. Bu, təsadüfi biznes əlaqələrindən çıxaraq uzunmüddətli strateji tərəfdaşlığa keçidi təmin edir. Əminliklə deyə bilirəm ki, Avropa ilə inteqrasiyanın güclənməsi, xüsusilə Almaniya kimi qitənin ən böyük iqtisadi gücü ilə strateji tərəfdaşlığın institusional çərçivəyə salınması Prezident İlham Əliyevin uğurlu xarici siyasətinin nəticəsidir. Digər tərəfdən Azərbaycanın tranzit qovşağı rolunun Avropa dövlətləri tərəfindən tanınması, ölkəmizin regional və qlobal iqtisadi siyasətdə əhəmiyyətini artırır və gələcək fərqli sahələrdə güclü inteqrasiyasına zəmin yaradır.
Qarabağ və Şərqi Zəngəzurda yaşıl enerji zonası layihələri Almaniyanın texnologiya üstünlükləri ilə birləşərək yeni əməkdaşlıq istiqamətləri üçün mühüm yollar açır. Azərbaycanın iqtisadi şaxələndirməsi neft-qaz sektorundan kənarda qeyri-neft sahələrinin inkişafını təmin edərək Almaniya kimi texnologiya liderləri ilə əməkdaşlığı mümkün edir. Ölkəmizin regional liderliyi Orta Dəhliz, Şərq-Qərb və Şimal-Cənub marşrutlarında oynadığı mühüm rol sayəsində Avropanın diqqətini Azərbaycana yönəldib. Paralel olaraq, innovasiya və rəqəmsallaşma istiqamətində həyata keçirilən sənaye parkları, azad iqtisadi zonalar və rəqəmsal iqtisadiyyat layihələri Avropa şirkətlərinin marağını artıraraq yeni əməkdaşlıq imkanları yaradıb. Beləliklə, bu üç istiqamət iqtisadi şaxələndirmə, regional liderlik və innovasiya-rəqəmsallaşma Prezident İlham Əliyevin uzaqgörən siyasətinin konkret nəticələri kimi Azərbaycanın həm Avropa ilə inteqrasiyasını, həm də qlobal iqtisadi platformalarda mövqeyini gücləndirib.
Beləliklə, Azərbaycan-Almaniya Biznes Şurasının yaradılması yalnız iqtisadi deyil, həm də siyasi baxımdan Azərbaycanın Avropa ilə inteqrasiyasının yeni mərhələsini təsdiqləyir. Bu, Prezident İlham Əliyevin uzaqgörən siyasətinin Avropa miqyasında konkret nəticələr verməsinin bariz nümunəsidir.

Türkan Cümşüdova - YAP üzvü

Telegramda izləyin