Dünya çempionatından sonra Afrika ölkəsinə turist marağı kəskin artıb

Futbol üzrə dünya çempionatındakı uğurlu çıxışından sonra Kabo-Verde turistlərin diqqət mərkəzinə çevrilib.

Qaunarinfo xəbər verir ki, bu barədə "Expedia"nın məlumatlarına istinadən "Express" nəşri yazır.

10 vulkanik adadan ibarət olan və təxminən 491 min nəfər əhalisi olan Afrika dövləti turnirdə nümayiş etdirdiyi performans sayəsində beynəlxalq miqyasda daha geniş tanınıb.

Məlumata görə, Kabo-Verdeyə səfərlə bağlı axtarış sorğularının sayı ötən illə müqayisədə 265 faiz artıb. Ümumilikdə isə adalarda istirahətə maraq 55 faiz yüksəlib.

"Island Hot List 2026" siyahısına daxil edilib

Kabo-Verde "Expedia" tərəfindən hazırlanan "Island Hot List 2026" siyahısına daxil edilib. Siyahıda dünyanın müxtəlif bölgələrindən turistlər arasında populyarlıq qazanan adalar yer alır.

Reytinqdə hər bir istiqamət ayrıca kateqoriya üzrə qiymətləndirilib. Bunlara romantik istirahət, sağlamlıq və relaksasiya, təbiət, ailəvi istirahət, qastronomiya, sərfəli lüks və digər istiqamətlər daxildir.

Kabo-Verde isə "Futboldan ilham alan ən yaxşı ada" nominasiyasında xüsusi mükafata layiq görülüb.

"Biz siyahını artıq tamamlamışdıq. Lakin bir istiqamət futbol azarkeşləri arasında o qədər böyük maraq yaratdı ki, ona ayrıca mükafat təqdim etmək qərarına gəldik", deyə "Expedia"nın turizm üzrə eksperti və rəsmi nümayəndəsi Melani Fiş bildirib.

Telegramda izləyin