Pentaqon İranla münaqişədə ölən hərbçilərin sayını gizlədir?

ABŞ hərbçiləri arasında İranla münaqişə nəticəsində həlak olanlar barədə məlumatlar artıq bir sutkaya yaxındır ki, Pentaqonun rəsmi platformasında yanlış əks olunur. Senatda təmsil olunan demokratlar qurumun rəhbəri Pit Heqsetdən məsələyə dərhal aydınlıq gətirməsini tələb edirlər.

Oxu.Az-ın CNN-ə istinadən verdiyi xəbərə görə, İranla toqquşmalar zamanı verilən itkiləri qeydə alan ABŞ Müdafiə Nazirliyinin rəsmi saytı təxminən 24 saat keçməsinə baxmayaraq, hələ də qeyri-dəqiq statistika yaymaqda davam edir.

Telekanalın məlumatına əsasən, iyulun 23-də Hərbi İtkilərin Təhlili Sisteminin (DCAS) statistik bazasından həlak olmuş dörd nəfər və onlarla yaralı hərbçi haqqında məlumat silinib. Halbuki, bundan əvvəl həlak olan amerikalı hərbçilərin sayının 18 olduğu bildirilirdi. Jurnalistlər xatırladıblar ki, Delaver ştatında hərbçilərin cəsədlərinin təhvil verilməsi mərasimində iştirak edən Prezident Donald Tramp da məhz bu itki sayını təsdiqləmişdi.

Yaranmış vəziyyətlə əlaqədar Demokratlar Partiyasının Senatdakı üzvləri Pentaqon rəhbəri Pit Heqsetə rəsmi məktub ünvanlayaraq izahat tələb ediblər.

Pentaqonun nümayəndəsi Şon Parnell isə "X" sosial şəbəkəsində etdiyi paylaşımda nazirliyin saytdakı "anomaliyalar"dan xəbərdar olduğunu və texniki problemlərin aradan qaldırılması istiqamətində iş aparıldığını bildirib. O, itkilərin həcminin bilərəkdən gizlədilməsi ilə bağlı səsləndirilən ittihamları qətiyyətlə təkzib edib.

Lakin CNN vurğulayır ki, DCAS platformasında sistemli problemlər müşahidə olunur və müxtəlif xətalar səbəbindən saytdakı göstəricilər mütəmadi olaraq dəyişir. Bununla yanaşı, Pentaqon yaralılar haqqında məlumatların gec yenilənməsini tibbi müayinələrin davam etməsi ilə əlaqələndirir; bu prosesin spansiyası isə bir neçə gündən bir neçə həftəyə qədər çəkə bilər.

Telegramda izləyin