İliyana Yotova Bolqarıstanın prezident seçkilərində öz namizədliyini irəli sürəcək

Bolqarıstan prezidentinin səlahiyyətlərini icra edən İliyana Yotova qarşıdan gələn prezident seçkilərində namizədliyini irəli sürəcəyini açıqlayıb.

"Report" xəbər verir ki, bu barədə "BNT-Novini" portalı məlumat yayıb.

İ.Yotova əlavə edib ki, onun prezident postuna namizədliyi təşəbbüs komitəsi tərəfindən irəli sürüləcək, ölkənin vitse-prezidenti postuna namizəd isə daha sonra məlum olacaq.

"Bəli, mən namizədliyimi irəli sürəcəyəm. Mənim namizədliyim təşəbbüs komitəsi tərəfindən irəli sürüləcək. Hesab edirəm ki, Bolqarıstanda bir çox insan məni dəstəkləyir", - o, qarşıdan gələn seçkilər barədə sualı cavablandırarkən bildirib.

İ.Yotova 2026-cı ilin yanvar ayının ortalarından, Bolqarıstanın sabiq prezidenti, hazırkı Baş nazir Rumen Radev istefa verdiyi vaxtdan dövlət başçısının səlahiyyətlərini icra edir. O, bu vəzifədə R.Radevin mandatının sonunadək - 2027-ci il yanvarın 22-dək qala bilər.

Qeyd edək ki, Bolqarıstanda prezident seçkilərinin tarixi rəsmi şəkildə elan edilməyib, lakin 2026-cı ilin noyabrında keçirilməsi gözlənilir.

Telegramda izləyin