"Daha dərin və sistemli alətlər geridə qalır" - AÇIQLAMA

"Azərbaycan bazarında marketinq mənzərəsinə baxanda maraqlı bir paradoks görünür: rəqəmsal kanallara xərclər artır, amma bu artım əsasən sosial media reklamları, əsas SEO və bir neçə "rahat" alətin ətrafında cəmlənir. Daha dərin və sistemli alətlər isə geridə qalır".

Bunu Sonxeber.az-a Strateji Kommunikasiya üzrə Ekspert Səfər Aslanov danışıb.

O, açıqlamasında qeyd edib ki, kifayət qədər istifadə olunmayan sahələr bunlardır:

"1. Marketinq avtomatlaşdırması və CRM inteqrasiyası

Xidmət təqdim edən agentliklər bunu özləri də "təklif" kimi təqdim edirlər. Bu isə bazarda hələ kütləvi tələbatın formalaşmadığını göstərir. E-mail/SMS seqmentasiyası, davranış əsaslı trigger-kampaniyalar və loyallıq axınları bəzi mütəxəssislər üçün hələ də yeni anlayış olaraq qalır.

2. E-mail marketinq

Qlobal təcrübədə müştəri saxlama (retention) alətlərinin əsaslarından biri hesab edilən e-mail marketinq yerli bazarda əsasən "əlavə" vasitə kimi qəbul olunur. Əsas büdcələr isə daha çox sosial media reklamlarına yönəldilir.

3. Data əsaslı qərarvermə və attribution

GA4, UTM izləmə və KPI hesabatlılığı mövcuddur, lakin kiçik və orta bizneslərdə bunlar çox vaxt formal şəkildə qurulur və real qərarvermə prosesinə təsir etmir.

4. Süni intellekt alətləri

Bəzi agentliklərin təcrübəsinə görə, bu sahəyə edilən investisiyalar yerli bazarda hələ zəif nəticə verir. Bunun əsas səbəbi iştirakçıların böyük əksəriyyətinin süni intellekt alətlərini aktiv şəkildə mənimsəməməsidir.

5. CTV və DOOH

Ekspertlər tərəfindən gələcəyin əsas trendləri kimi qeyd edilsə də, hazırda bu istiqamətlər yerli bazarda demək olar ki, geniş tətbiq olunmur.

6. Ənənəvi və rəqəmsal marketinqin inteqrasiyası (omnichannel)

QR kodlu flayerlər, izlənilə bilən SMS linkləri kimi sadə hibrid həllər mövcud olsa da, bunlar geniş miqyasda tətbiq edilmir.

Fikrimcə, bu boşluğun əsas nəticəsi ikili xarakter daşıyır. Bir tərəfdən, bu alətlərdən düzgün istifadə edən azsaylı şirkətlər üçün nisbətən ucuz rəqabət üstünlüyü yaranır. CRM avtomatlaşdırmasını və data əsaslı attribution sistemlərini düzgün quran bizneslər, rəqiblərinin yalnız "büdcə xərcləyib nəticəni görməmək" yanaşmasında olduğu bazarda fərqlənmək imkanı əldə edir.

İkinci mühüm məqam isə məlumat sahibliyi məsələsidir. E-mail və CRM əsaslı marketinq şirkətə öz auditoriyası üzərində nəzarət imkanı verir. Sosial media platformalarından həddindən artıq asılılıq isə həmin auditoriyanı "icarəyə götürmək" deməkdir. Alqoritmlər dəyişdikdə və ya reklam qiymətləri artdıqda, yalnız platforma mərkəzli strategiyalara güvənən bizneslər daha həssas vəziyyətə düşür".

Telegramda izləyin