" Azərbaycan və Qırğızıstanı ortaq tarix, ortaq mədəniyyət, ortaq mənəvi dəyərlər və türk kimliyi birləşdirir" - Bəhruz Quliyev

"Azərbaycan Prezidenti cənab İlham Əliyevin Qırğızıstana dövlət səfəri iki qardaş ölkə arasında münasibətlərin tarixində yeni mərhələnin başlanğıcı kimi qiymətləndirilməlidir. Bu səfərin ən mühüm siyasi nəticəsi Azərbaycan-Qırğızıstan münasibətlərinin strateji tərəfdaşlıq səviyyəsindən müttəfiqlik səviyyəsinə yüksəlməsidir. İmzalanan Müttəfiqlik haqqında Bəyannamə göstərir ki, Bakı və Bişkek artıq münasibətlərini təkcə dostluq və qardaşlıq prinsipləri əsasında deyil, həm də uzunmüddətli siyasi, iqtisadi və təhlükəsizlik maraqlarına söykənən müttəfiqlik müstəvisində inkişaf etdirəcəklər".

Bu fikirləri Sonxeber.az-a danışan Səs qəzetinin baş redaktoru, siyasi ekspert Bəhruz Quliyev deyib.

Ekspert bildirib ki, bu, sadəcə diplomatik termin dəyişikliyi deyil. Müttəfiqlik münasibətləri dövlətlərin beynəlxalq məsələlərdə daha sıx koordinasiyasını, qarşılıqlı siyasi dəstəyini, təhlükəsizlik, nəqliyyat, iqtisadiyyat, investisiya, enerji, humanitar sahələr və Türk dünyasının inteqrasiyası istiqamətində əməkdaşlığın daha da dərinləşdirilməsini nəzərdə tutur.

"Səfər zamanı Azərbaycan Prezidenti cənab İlham Əliyevin və Qırğızıstan Prezidenti Sadır Japarovun qarşılıqlı şəkildə ali dövlət ordenləri ilə təltif olunması da xüsusi əhəmiyyət daşıyır. Bu, iki dövlət başçısı arasında yüksək etimadın, qarşılıqlı hörmətin və qardaşlığın, eləcə də Azərbaycan-Qırğızıstan münasibətlərinin çatdığı ən yüksək siyasi səviyyənin rəmzidir.

Azərbaycan və Qırğızıstanı ortaq tarix, ortaq mədəniyyət, ortaq mənəvi dəyərlər və türk kimliyi birləşdirir. Hər iki ölkə çərçivəsində türk dünyasının birliyinin möhkəmləndirilməsi, Orta Dəhlizin inkişafı, regional nəqliyyat-kommunikasiya layihələrinin genişləndirilməsi və iqtisadi inteqrasiyanın gücləndirilməsi istiqamətində fəal əməkdaşlıq edir.
Hesab edirəm ki, cənab Prezident İlham Əliyevin bu səfəri təkcə Azərbaycan-Qırğızıstan münasibətlərində deyil, bütövlükdə Türk dünyasının siyasi inteqrasiyası baxımından tarixi əhəmiyyətə malikdir. Bu gün Bakı ilə Bişkek arasında formalaşan müttəfiqlik modeli gələcəkdə digər türk dövlətləri üçün də nümunə olacaq, regionda sülhün, sabitliyin və qarşılıqlı inkişafın möhkəmlənməsinə mühüm töhfə verəcək."- deyə, B.Quliyev əlavə edib.

Telegramda izləyin