"Hamiləlikdə 7 dəfə həkim müayinəsi mütləqdir" - Fəxrəndə Əkbərova

Hamiləlik və doğuş prosesi hər bir qadının həyatında ən məsuliyyətli, eyni zamanda tibbi baxımdan ən həssas mərhələlərdən biridir. Təəssüf ki, bəzən vaxtında aşkar olunmayan risklər və ya gecikmiş müdaxilələr ana və körpə sağlamlığı üçün ciddi fəsadlara, hətta faciəvi sonluqlara gətirib çıxarır. Mütəxəssislər bildirirlər ki, doğuş zamanı yarana biləcək ağırlaşmaların böyük əksəriyyətinin qarşısını hamiləlik dövründəki düzgün nəzarətlə almaq mümkündür.

Mövzu ilə bağlı Sonxeber.az-a danışan mama-ginekoloq Fəxrəndə Əkbərova bildirir ki, doğuş zamanı ana və körpə ölümlərinin bir neçə səbəbi ola bilər.

​"Hamiləlik dövrü özlüyündə kifayət qədər riskli bir mərhələdir və hər bir qadın müəyyən dərəcədə risk qrupuna daxildir. Bu risklər az, orta və çox riskli olmaqla təsnifatlaşdırılır. Təəssüf ki, bəzi qadınlar hamiləlik dövründə müəyyən ciddi problemlərlə rastlaşırlar. Baş verən arzuolunmaz halların və ağırlaşmaların əsas səbəbi isə hamiləlik zamanı risk faktorlarının vaxtında müəyyən edilməməsidir. Burada həm həkim səhlənkarlığı, həm də xəstənin vaxtında həkimə müraciət etməməsi amili rol oynaya bilər.

​Doğuş zamanı baş verən ölümlərin və ağırlaşmaların əsas səbəblərinə massiv qanaxmalar, gecikmiş tibbi yardım, preeklampsiya, tromboemboliya, sepsis, cift patologiyaları və bu kimi digər ağır fəsadlar daxildir. Doğuşun 3-cü dövrünün aktiv aparılması bu baxımdan çox önəmlidir. Bəzən tibbi səhvlər və risklərin vaxtında təyin edilə bilməməsi də vəziyyəti kəskinləşdirir.

​Bu kimi ağırlaşmaların vaxtında aşkar olunması həyati əhəmiyyət kəsb edir. Bunun üçün də her bir hamilə qadın mütləq antenatal nəzarətdə olmalı və vaxtında həkimə müraciət etməlidir. Hamiləlik dövründə 7 dəfə həkim müayinəsində olmaq (7 gəliş) mütləqdir. Yalnız bu halda risklər vaxtında təyin oluna və ola biləcək faciələrin qarşısı alına bilər."

Müsahibimiz bildirir ki, paytaxt və rayonlarda işləyən mütəxəssizlər bilik səviyyəsi eynidir.

"Düzünü desək, fərq böyükdür. Bakı şəhərindəki tibb müəssisələrində müasir avadanlıqlar daha çoxdur və texniki imkanlar daha genişdir. Lakin mütəxəssis faktoru baxımından vəziyyət fərqlidir. İstər şəhərdə, istərsə də rayonlarda çalışan həkim olsun, mütəxəssis eyni mütəxəssisdir. Bu gün hər bir həkim öz üzərində çalışır, bilik və təcrübəsini artırmağa səy göstərir. Sadəcə, regionlarla paytaxt arasındakı əsas fərq məhz texniki təchizat və infrastruktur imkanları ilə bağlıdır."

Türkanə Muradlı

Telegramda izləyin