Bakı Metrosunda YENİLİK: Bu dəyişikliklər olacaq

İctimai nəqliyyatın təkmilləşdirilməsi istiqamətində həyata keçirilən layihələr çərçivəsində Bakı metrosunda Qırmızı və Yaşıl xətlərin ayrılması məsələsi də diqqət mərkəzindədir. Bu layihənin əsas məqsədi metro sisteminin ötürücülük qabiliyyətini artırmaq, qatarların hərəkətini daha səmərəli təşkil etmək və sərnişin sıxlığını azaltmaqdır. Bəs, xətlərin ayrılması sərnişindaşımaya, qatarların hərəkət intervalına və ümumilikdə şəhərdaxili nəqliyyatın fəaliyyətinə hansı təsirləri göstərəcək?

Məsələ ilə bağlı Sonxeber.az-a açıqlama verən nəqliyyat eksperti Eldəniz Cəfərov bildirib ki, vaxtilə Bakı Metropoliteni sovet standartlarına uyğun tikilib və həmin dövrdə Bakı şəhərinin əhalisi daha az, iqtisadiyyatı isə daha kiçik olub. Buna görə də metro sistemi o dövrün tələblərinə uyğun layihələndirilib.
"Lakin bu gün mövcud infrastruktur müasir tələblərə tam cavab vermədiyi üçün xətlərin ayrılması nəzərdə tutulur. Bu, ilk növbədə təhlükəsizlik baxımından vacibdir. Belə ki, qatarların toqquşma riskinin azaldılması, həmçinin onların stansiyalarda rahat manevr edərək geri qayıtmasının təmin edilməsi məqsədi daşıyır" - ekspert bildirib.

Onun sözlərinə görə bu imkan yaradıldıqdan sonra marşrutlara daha çox qatar buraxmaq mümkün olacaq:

"Qatarların sayının artması isə stansiyalar arasındakı hərəkət intervalını azaldacaq. İntervalın azalması nəticəsində sərnişindaşıma daha sürətli təşkil olunacaq və mövcud sıxlıq əhəmiyyətli dərəcədə aradan qalxacaq".

Röyalə Xəyal

Telegramda izləyin