MİQ-də vakant yer seçimi başlayır: Hansı müəllim ixtisaslarına daha çox ehtiyac var? - TƏHSİL EKSPERTİNDƏN AÇIQLAMA

Azərbaycanda müəllimlərin işə qəbulu üzrə növbəti mərhələ - vakant yerlərin seçimi avqustun 5-də başlayır. Minlərlə namizəd hansı məktəbdə çalışacağını müəyyənləşdirəcək bu prosesə hazırlaşarkən, ən çox maraq doğuran məsələlərdən biri də hansı fənlər üzrə müəllimlərə daha çox ehtiyacın olmasıdır.

Bəs hazırda əmək bazarında hansı ixtisaslar üzrə müəllim çatışmazlığı müşahidə olunur və vakant yerlərin böyük hissəsi hansı fənlərin payına düşür?

Mövzu ilə bağlı təhsil eksperti Şəmsi Qoca Sonxeber.az-a açıqlamasında bildirdi ki, müəllimlərin işə qəbulu (MİQ) imtahanlarının vakant yer seçimi mərhələsində hər il olduğu kimi, bir sıra fənn və ixtisaslar üzrə tələbatın daha yüksək olduğu müşahidə olunur. Ölkə üzrə mövcud vakansiyaların strukturuna və ümumi tendensiyalara əsasən aşağıdakı ixtisaslara ehtiyac daha çoxdur:

* İbtidai sinif müəllimliyi: Məktəb şəbəkəsinin genişliyi, ibtidai siniflərin çoxluğu və şagird kontingentinin artımı səbəbindən hər il ən çox vakant yer məhz bu ixtisas üzrə təklif olunur.

* Xarici dil müəllimləri (xüsusilə İngilis dili): Həm paytaxtda, həm də regionlarda xarici dil biliklərinə tələbatın yüksək olması bu ixtisas üzrə vakansiyaların sayını artırır.

* Riyaziyyat və İnformatika müəllimliyi: Dəqiq elmlərə və rəqəmsal bacarıqlara verilən dövlət dəstəyi, eləcə də dərs saatlarının həcmi fonunda bu sahədə vakant yerlər kifayət qədər çoxdur.

* Azərbaycan dili və ədəbiyyatı: Humanitar fənlər içərisində ən çox tələbat duyulan və geniş saat bölgüsünə malik əsas fənlərdən biridir.

* Təbiət fənləri (Fizika, Kimiya, Biologiya): Xüsusilə regionlardakı ümumtəhsil məktəblərində bu fənləri tədris edən ixtisaslı kadrlara ehtiyac həmişə aktual olaraq qalır.

Telegramda izləyin