Psixoloq valideynlərə xəbərdarlıq etdi - AÇIQLAMA

Azərbaycanda 16 yaşı tamam olmamış uşaqların sosial şəbəkələrdə fərdi rəqəmsal hesab (profil) açması qanunla qadağan edilir. Milli Məclisdə qəbul edilən yeni qanun layihəsinə əsasən 16 yaşdan aşağı uşaqlar platformalarda heç bir halda şəxsi hesab yarada bilməzlər.16-18 yaş arası yeniyetmələr yalnız valideynlərinin və ya qanuni nümayəndələrinin rəsmi razılığı və nəzarəti ilə qeydiyyatdan keçə bilərlər.

Mövzu ilə bağlı Sonxeber.az-a danışan klinik psixoloq, psixoterapevt Rövşən Nəcəfov deyib ki, xüsusilə erkən yaşlarda nəzarətsiz istifadə uşaqların psixoloji inkişafına, özünəinamına və ailə münasibətlərinə mənfi təsir göstərə bilər:

"Sosial mediada təqdim olunan "ideal" həyat tərzi yeniyetmələrdə öz ailələri və həyatları ilə bağlı davamlı müqayisə hissi yaradır ki, bu da narazılıq və emosional gərginliyə səbəb ola bilər. Yaşa uyğun tənqidi düşüncə formalaşmadığı üçün uşaqlar və yeniyetmələr müxtəlif zərərli ideologiyaların, manipulyativ məzmunların və radikal təsirlərin hədəfinə çevrilə bilərlər. Bu risk kifayət qədər böyükdür və onların dünyagörüşünə, davranışına və gələcək seçimlərinə mənfi təsir göstərir.

Əsas məsələ yalnız qadağa deyil, onun düzgün izah olunması və maarifləndirmə ilə müşayiət edilməsidir. Qadağalar səbəbləri izah edildikdə qaydaya çevrilir və cəmiyyət tərəfindən daha asan qəbul olunur. Valideyn nəzarəti, rəqəmsal savadlılıq və yaşa uyğun məhdudiyyətlər birlikdə tətbiq olunarsa, uşaqların daha sağlam rəqəmsal mühitdə böyüməsinə və məsuliyyətli internet istifadəçisi kimi formalaşmasına töhfə verə bilər".

Cavidan Mirzəzadə

Telegramda izləyin