Protein tozları həqiqətən faydalıdır, yoxsa marketinq oyunu? - QİDA EKSPERTİNDƏN AÇIQLAMA

Son illər idman zalları ilə yanaşı, apteklərdə və onlayn mağazalarda satılan protein tozlarına maraq əhəmiyyətli dərəcədə artıb. İstehsalçılar bu məhsulların əzələ inkişafını sürətləndirdiyini, bərpanı yaxşılaşdırdığını və gündəlik zülal ehtiyacını qarşıladığını iddia edirlər. Lakin bir çox insanı düşündürən əsas sual budur: satışda olan proteinlər həqiqətən sağlamlıq və idman nəticələri üçün faydalıdır, yoxsa bu məhsullar ətrafında formalaşdırılan böyük marketinq kampaniyasının bir hissəsidir?

Mövzu ilə bağlı qida eksperti Fərid Səfərov Sonxeber.az-a açıqlamasında bildirdi ki, satışda olan protein tozları və digər protein məhsulları hər kəs üçün vacib və ya möcüzəvi qida deyil. Onun sözlərinə görə, onlar əslində düzgün istifadə edildikdə faydalı ola bilən qida əlavələridir: "Əgər insan gündəlik zülal ehtiyacını ət, balıq, yumurta, süd məhsulları, paxlalılar kimi təbii qidalardan qarşılayırsa, əlavə protein qəbul etməsinə ehtiyac olmaya bilər. Lakin idmanla müntəzəm məşğul olanlar, yaşlı insanlar, xəstəlikdən sonra bərpa dövründə olanlar və ya qida ilə kifayət qədər zülal qəbul edə bilməyən şəxslər üçün keyfiyyətli protein məhsulları praktik seçim ola bilər. Burada əsas məsələ məhsulun keyfiyyəti, tərkibi və etibarlı istehsalçı tərəfindən hazırlanmasıdır.

Təəssüf ki, bazarda marketinq məqsədilə "yağ yandırır", "əzələni sürətlə artırır", "möcüzəvi nəticə verir" kimi elmi əsası olmayan iddialarla satılan məhsullar da var. Protein tozu özü-özlüyündə nə əzələ yaradır, nə də arıqladır. Nəticəni müəyyən edən balanslı qidalanma, fiziki aktivlik və ümumi həyat tərzidir.

Yəni protein məhsullarını nə tamamilə faydasız hesab etmək, nə də onları hər kəs üçün zəruri qəbul etmək doğrudur. Ən doğru yanaşma insanın yaşına, sağlamlıq vəziyyətinə, fiziki aktivliyinə və gündəlik zülal ehtiyacına uyğun qərar verməkdir. Protein əlavələri sağlam qidalanmanı əvəz etmir, yalnız ehtiyac olduqda onu tamamlayan vasitə kimi istifadə edilməlidir.

Sağlam qidalanaraq sağlam yaşayın!".

Telegramda izləyin