"Uşaqlara sosial şəbəkələrə girişə qoyulan məhdudiyyətin məqsədi onların sağlam rəqəmsal mühitdə böyüməsini təmin etməkdir" - DEPUTAT

"16 yaşa qədər uşaqların sosial şəbəkələrdən istifadəsinin məhdudlaşdırılması məsələsi son illərdə uşaqların təhlükəsizliyi baxımından geniş müzakirə olunur. Belə bir məhdudiyyətin əsas məqsədi uşaqları rəqəmsal mühitdəki risklərdən qorumaq və onların sağlam inkişafını dəstəkləməkdir"

Bunu Sonxeber.az-a danışan deputat Anar Məmmədov bildirib.

Deputat qeyd edib, 16 yaşa qədər uşaqların sosial şəbəkələrdən istifadəsinin məhdudlaşdırılması ilk olaraq onlara qarşı kiberzorakılığın qarşısının alacaq:

"Təəssüf ki, sosial şəbəkələrdə uşaqlar təhqir, təhdid və onlayn təzyiq halları ilə üzləşə bilirlər. Bundan əlavə uşaqlara sosial şəbəkələrə girişə məhdudiyyət qoyulması yaşa uyğun olmayan görüntü və məlumatların onlara çatmasının qarşısını alacaq. Ən önəmlisi isə şəxsi məlumatların qorunmasına. Belə ki, uşaqlar şəxsi məlumatlarını, fotoşəkillərini və digər məlumatları bilmədən paylaşa bilərlər. Sosial şəbəkələrdə çox vaxt keçirmək uşaqların təhsilinə də təsir edir. Həddindən artıq sosial şəbəkə istifadəsi diqqətin dərsdən yayınmasına və vaxtın səmərəsiz keçirilməsinə səbəb ola bilər.

Sosial şəbəkələrdə edilən bəzi paylaşımlar uşaqların psixologiyasına da mənfi təsir edir. Bundan əlavə daimi müqayisə, mənfi şərhlər və onlayn təzyiq uşaqlarda stress və narahatlıq yarada bilər.İstifadə müddətinin məhdudlaşdırılması gündəlik rejimin daha balanslı qurulmasına kömək edə bilər.Lakin tam qadağanın müəyyən çətinlikləri də var
Sosial şəbəkələr yalnız əyləncə vasitəsi deyil; onlar təhsil, ünsiyyət və məlumat əldə etmək üçün də istifadə olunur. Buna görə də sadəcə qadağa qoymaqla yanaşı, valideyn nəzarəti, yaşa uyğun hesabların tətbiqi, platformaların yaş yoxlaması və uşaqlara rəqəmsal savadlılığın öyrədilməsi də vacibdir. 16 yaşadək uşaqların sosial şəbəkələrə girişinin məhdudlaşdırılması onların təhlükəsizliyi baxımından faydalı ola bilər. Ancaq ən effektiv yanaşma qadağa ilə yanaşı valideyn, məktəb, dövlət və sosial media platformalarının birgə məsuliyyət daşıdığı kompleks qoruma sisteminin yaradılmasıdır".

Deputat vurğulayıb ki, bu dəyişikliklərin əsas məqsədlərindən biri uşaqları zərərli informasiya, kiberzorakılıq, şəxsi məlumatların sui-istifadəsi və digər onlayn risklərdən qorumaqdır:

"Ümumilikdə isə qəbul edilmiş yeni "Uşaq hüquqları haqqında" qanun da internet və informasiya-telekommunikasiya şəbəkələrindən istifadə etməklə uşaqlara qarşı zorakılıq risklərinin nəzərə alınmasını təsbit edir. 16 yaşadək uşaqlar üçün sosial şəbəkələrdə fərdi hesabların yaradılmasına məhdudiyyət qoyulması uşaqların rəqəmsal təhlükəsizliyinin artırılması istiqamətində mühüm addım kimi qiymətləndirilə bilər. Bununla yanaşı, yalnız məhdudiyyətin tətbiqi kifayət deyil. Valideyn nəzarəti, məktəblərdə rəqəmsal savadlılığın artırılması, sosial şəbəkə platformalarının məsuliyyətinin gücləndirilməsi və uşaqların internet təhlükəsizliyi barədə maarifləndirilməsi də paralel şəkildə həyata keçirilməlidir.
Beləliklə, əsas məqsəd uşaqları internetdən təcrid etmək deyil, onların təhlükəsiz, məsuliyyətli və sağlam rəqəmsal mühitdə böyüməsini təmin etməkdir".

Telegramda izləyin